«قازمۇنايگاز» ۇك» اق باسقارما توراعاسى اليك ايدارباەۆ ءورت شىققان جاڭاوزەن قالاسىنداعى قازاق گاز وڭدەۋ زاۋىتىنا ارنايى بارىپ, قىزىل جالىننان كەلگەن زالالدى قالپىنا كەلتىرۋ جۇمىستارىمەن تانىستى.
بۇدان بۇرىن حابارلاعانىمىزداي, 16 ماۋسىم كۇنى نۇر-سۇلتان قالاسىنىڭ ۋاقىتىمەن ساعات 23:15-تە ماڭعىستاۋ وبلىسىنىڭ جاڭاوزەن قالاسىندا ورنالاسقان «قازاق گاز وڭدەۋ زاۋىتى» جشس-عا قاراستى كومپرەسسورلىق تسەحتىڭ اۋا توڭازىتقىشىندا ءورت شىققان ەدى. توسىننان كەلگەن ءتىلسىز جاۋدى ورشىتپەۋ ءۇشىن دەرەۋ گاز بەرۋ دوعارىلىپ, زاۋىت تا تولىعىمەن اپاتتىق رەجىمدە جۇمىسىن توقتاتقان.
وتتىڭ تۇتانۋى جونىندە تۇسىنىك بەرگەن «قازگوز» جشس ديرەكتورى ناقبەرگەن تولەپوۆ ءورتتى ءسوندىرۋ ءۇشىن شۇعىل شارالار قولعا الىنعانىن, وعان جەكە ءورت ءسوندىرۋ توپتارى مەن تجد كۇشتەرى جانە «قازگوز», «وزەنمۇنايگاز» اق قىزمەتكەرلەرى جۇمىلدىرىلعانىن جەتكىزدى.
ءورت ساعات 23:52-دە تولىق ءسوندىرىلدى. قايتىس بولعاندار مەن زارداپ شەككەندەر بولعان جوق. ال ءورت شىققان اۋا توڭازىتقىشىنىڭ تەك كوتەرگىش كونسترۋكتسياسى زاقىمدالعان. نەگىزگى قوندىرعىعا زيان كەلمەگەن.
قمگ باسشىسى اليك ايدارباەۆ كاسىپورىننىڭ تەحنولوگيالىق جەلىسىن ارالاپ, ورتتەن كەيىنگى قالپىنا كەلتىرۋ جۇمىستارى قالاي جۇرگىزىلىپ جاتقانىن كوردى. بۇدان كەيىن ول ماڭعىستاۋ وبلىسى اكىمىنىڭ ءبىرىنشى ورىنباسارى ا.مەڭدىباەۆتىڭ, جاڭاوزەن قالاسىنىڭ اكىمى م.يباعاروۆتىڭ, «قازگوز» جشس, «وزەنمۇنايگاز» اق جانە «ماڭعىستاۋمۇنايگاز» اق ءبىرىنشى باسشىلارىنىڭ قاتىسۋىمەن جينالىس وتكىزدى.
جيىندا ءورت سالدارىن جويۋ بويىنشا قابىلدانعان شارالار تالقىلانىپ, وسىنداي جاعدايلاردىڭ الدىن الۋ جونىندە بىرقاتار ناقتى تاپسىرما بەرىلدى.
بۇدان بولەك, كاسىپورىندا شىققان ءورت «ماڭعىستاۋمۇنايگاز» اق جانە «وزەنمۇنايگاز» اق كەن ورىندارىنداعى مۇناي ءوندىرۋ دەڭگەيىنە تەرىس اسەر ەتپەگەنى ايتىلدى.
سونىمەن قاتار اليك ايدارباەۆ ءورت ءسوندىرۋ كەزىندە ۇيىمشىلدىق تانىتىپ, ۇيلەسىمدى ءىس-ارەكەتتەرىمەن ءتىلسىز جاۋدى اۋىزدىقتاعان ورتكە قارسى قىزمەت ماماندارىنا, قازگوز, وزەنمۇنايگاز ۇجىمدارىنا العىسىن ءبىلدىردى.
«قازىرگى مىندەت – ءورت زارداپتارىن قىسقا مەرزىم ىشىندە جويىپ, كاسىپورىننىڭ گازدى تولىق قابىلداۋىن قامتاماسىز ەتۋ», دەپ اتاپ ءوتتى ول.
بۇگىندە «قازمۇنايگاز» ۇك» اق-دا باسقارما توراعاسى اليك ايدارباەۆتىڭ توراعالىعىمەن جەدەل شتاب جۇمىس ىستەپ جاتىر. ونىڭ قۇرامىنا ءتيىستى قۇرىلىمدىق بولىمشەلەردىڭ قىزمەتكەرلەرى كىردى. جەدەل شتاب ءورتتىڭ شىعۋ سەبەپتەرىن انىقتاپ, زەرتتەۋ جۇمىستارىن جۇرگىزۋدە.
ەڭ باستىسى, ءورتتىڭ سالدارىنان زاۋىت قىزمەتكەرلەرى, جاڭاوزەن قالاسى مەن جاقىن ماڭدا ورنالاسقان ەلدى مەكەن تۇرعىندارى زارداپ شەككەن جوق جانە ولاردىڭ ءومىرى مەن دەنساۋلىعىنا دا قاۋىپ جوق.