Nur Otan پارتياسى جانىنداعى Jas Otan جاستار قاناتىنىڭ قولداۋىمەن جاستار اراسىندا شەشەندىك پەن ۇتقىر وي يەلەرىنىڭ سايىسى – اۋىسپالى كۋبوگى ءوتتى. وسىمەن 19-رەت ۇيىمداستىرىلىپ وتىرعان ءىس-شاراعا جاستار بەلسەنە اتسالىستى.
پىكىرسايىس جاستاردىڭ وي ورىستەرىن دامىتۋعا جانە ءوز ۇستانىمدارىن بىلدىرۋگە جاردەمدەسەدى. سونىمەن قاتار كەز كەلگەن جاعدايدى, پروبلەمانى ءارتۇرلى جاعىنان تالداۋعا جانە جاڭا يدەيالاردى قابىلداۋعا يكەمدەيدى.
شەشەندىك پەن ۇتقىر وي يەلەرىنىڭ سايىسىنا ەلىمىزدىڭ بارلىق ايماعىنان 40 كوماندا قاتىستى. بيىل تۋرنير الماتى قالاسى ءال-فارابي اتىنداعى قازۇۋ-دا ءوتتى.
ءتۋرنيردىڭ نەگىزگى ۇيىمداستىرۋشىسى – Nur Otan پارتياسى جانىنداعى Jas Otan جاستار قاناتى. سونداي-اق ءتۋرنيردىڭ وتۋىنە ءال-فارابي اتىنداعى قازۇۋ جانە Alpha academy كومپانياسى قولداۋ كورسەتتى. اتالعان كومپانيا ءار قاتىسۋشىعا سەرتيفيكات تابىستادى. جاسوتاندىقتار, بەلسەندىلەر, ستۋدەنتتەر جانە دەبات كلۋبتارىنىڭ وكىلدەرى وزەكتى ماسەلەلەردى تالقىلاپ, قازىرگى مىندەتتەردى شەشۋ بويىنشا ءوز كوزقاراستارىن ءبىلدىردى.
تۋرنير بارىسىندا جاستار «الەمنىڭ ونلاين فورماتقا تولىق كوشۋى», «بارلىق قازاقستاندىقتى مىندەتتى تۇردە ۆاكتسينالاۋ», «ەل مەكتەپتەرىندە بۋللينگتىڭ الدىن الۋ بويىنشا ءتيىمدى تاسىلدەر ازىرلەۋ» جانە باسقا دا وزەكتى تاقىرىپتار بويىنشا ويلارىن ءبولىستى.
Jas Otan قاناتىنىڭ جەتەكشىسى نۇرجان جەتپىسباەۆ اتاپ وتكەندەي, پىكىرسايىس جاستاردىڭ الەۋەتىن ىسكە اسىرۋعا, جاڭا كوشباسشىلاردى تاربيەلەۋگە كومەكتەسەدى جانە قوعامنىڭ وزەكتى سۇراقتارىنا جاۋاپ بەرەدى.
«پىكىرسايىس جاستارعا ءوز كوزقاراستارىن جەتكىزۋگە كومەكتەسەدى. ولاردان بولاشاق ساياساتكەرلەر, كوشباسشىلار قالىپتاسادى, سوندىقتان پىكىرسايىس قوزعالىسىن قولداۋ قاجەت. بىزگە جاستار ۇيىمى رەتىندە جاس بەلسەندىلەرىمىزدىڭ ءوزارا پىكىر الماسۋى اسا ماڭىزدى», دەپ اتاپ ءوتتى ن.جەتپىسباەۆ.
تۋرنير قورىتىندىسى بويىنشا قازاقتىلدىلەر ليگاسىندا ءبىرىنشى ورىندى جامبىل وبلىسى يەمدەندى, ەكىنشى ورىن اقتوبە وبلىسىنىڭ دەباتشىلارىنا بۇيىردى, ءۇشىنشى ورىن – تۇركىستان وبلىسىندا.
ورىستىلدىلەر ليگاسىندا ءبىرىنشى ورىندى قوستاناي وبلىسىنىڭ كومانداسى يەلەندى, ەكىنشى ورىنعا سولتۇستىك قازاقستان وبلىسىنىڭ دەباتشىلارى يە بولدى, ءۇشىنشى ورىن – نۇر-سۇلتان قالاسىنىڭ ەنشىسىندە.
پىكىرسايىس قورىتىندىسىندا جۇلدەلى ورىندارمەن قاتار, ۇزدىك سپيكەرلەر مەن ۇزدىك تورەشى دە انىقتالدى.