سەناتتىڭ كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ كەڭەيتىلگەن وتىرىسى بولدى. ۆلاديمير ۆولكوۆتىڭ توراعالىق ەتۋىمەن وتكەن جيىندا سەناتورلار «مەملەكەتتىك فەلدەگەرلىك بايلانىس تۋرالى» زاڭ جوباسىن تالقىلادى, دەپ حابارلادى پالاتانىڭ ءباسپاسوز قىزمەتى.
قۇجات مەملەكەتتىك فەلدەگەرلىك قىزمەتتىڭ قۇقىقتىق مارتەبەسىن ارتتىرۋعا جانە ەل ىشىندە دە, ۇكىمەتارالىق ءوزارا قارىم-قاتىناستاردا دا ءتيىمدى فەلدەگەرلىك بايلانىس جۇيەسىن قالىپتاستىرۋعا باعىتتالعان. زاڭ جوباسىنىڭ جەكەلەگەن ەرەجەلەرىندە كادر قۇرامى, قىزمەت وتكەرۋ ءتارتىبى مەن شارتتارى, ەڭبەك قاتىناستارى, زەينەتاقىمەن قامسىزداندىرۋ ماسەلەلەرى رەتتەلەدى. سونداي-اق فەلدەگەرلىك بايلانىس قىزمەتكەرلەرىنىڭ جەكە قاۋىپسىزدىگىنە, قۇقىقتىق قورعالۋىنا جانە جاۋاپكەرشىلىگىنە كەپىلدىكتەر بەلگىلەنەتىن بولادى. سالا قىزمەتكەرلەرى مەن ولاردىڭ وتباسى مۇشەلەرىنە الەۋمەتتىك كەپىلدىكتەر كوزدەلىپ وتىر. «وسى سالاداعى قىزمەتكەرلەردىڭ جۇمىسىنىڭ ماڭىزدىلىعى مەن قاۋىپتىلىگىن ەسكەرە كەلىپ مەملەكەت تاراپىنان قىزمەت بابىمەن قونىس اۋىستىرۋدا جەكە زاتتارىن تاسىمالداۋ, ۇشاقتا ءجۇرىپ قىزمەتتىك مىندەتىن اتقاراتىنداردىڭ جالاقىسىنا قوسىلاتىن تولەماقى, زەينەتكە شىعاتىن كەزدەگى بەرىلەتىن ۇستەمە تولەماقى, ولاردىڭ جانە وتباسى مۇشەلەرىنىڭ دەنساۋلىعى مەن مۇلكىنە كەلتىرىلگەن زالالدى وتەۋ سىندى ارناۋلى الەۋمەتتىك كەپىلدىكتەر ۇسىنىلادى», دەدى نۇرلان بەكنازاروۆ.
وتىرىستا سەناتورلار, سونداي-اق «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك فەلدەگەرلىك بايلانىس جانە ىشكى ىستەر ورگاندارىنىڭ قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن دا قارادى.
«مەملەكەت باسشىسىنىڭ جولداۋىنداعى ۋچاسكەلىك پوليتسيا ينسپەكتورىنىڭ مارتەبەسىن زاڭدى تۇردە ارتتىرۋعا قاتىستى ايتىلعانداردى ىسكە اسىرۋ اياسىندا ولارعا ءتيىمدى جۇمىس ىستەۋگە قاجەتتى وكىلەتتىكتەردى بەرە وتىرىپ «قر ىشكى ىستەر ورگاندارى تۋرالى» زاڭعا ءتيىستى تۇزەتۋلەر ازىرلەندى. ولارعا بەكىتىلگەن ۋچاسكەدە قۇقىق بۇزۋشىلىقتاردى جاساۋعا ىقپال ەتەتىن سەبەپتەر مەن جاعدايلار انىقتالعان كەزدە وسىنداي سەبەپتەر مەن جاعدايلاردى جويۋ جونىندە جەكە جانە زاڭدى تۇلعالارعا شارالار قابىلداۋ قاجەتتىلىگى تۋرالى ءوز بەتىنشە ۇسىنىستار ەنگىزۋ قۇقىعىن بەرۋ ارقىلى ۋچاسكەلىك ينسپەكتورلاردىڭ مارتەبەسى ارتا تۇسەدى», دەدى ۆ.ۆولكوۆ.
زاڭ جوباسىنا سايكەس, ۋچاسكەلىك پوليتسيا ينسپەكتورلارى بولىمشەلەرىنىڭ قۇرامىنا ۋچاسكەلىك پوليتسيا ينسپەكتورلارىنىڭ كومەكشىلەرى ەنگىزىلەتىن بولادى. ال ازاماتتىق قورعاۋ ورگاندارى ىشكى ىستەر ورگاندارىنىڭ جۇيەسىنەن شىعارىلادى, سوعان بايلانىستى ازاماتتىق قورعاۋ سالاسىنداعى مەملەكەتتىك باقىلاۋ ءىىو قۇزىرەتىنەن شىعارىلادى.
ودان باسقا, «ازاماتتىق قورعاۋ تۋرالى» زاڭعا مەملەكەتتىك ورتكە قارسى قىزمەت ورگاندارىنا ورتكە بايلانىستى قىلمىستىق قۇقىق بۇزۋشىلىقتار تۋرالى ىستەر بويىنشا انىقتاۋ جۇرگىزۋگە وكىلەتتىك بەرۋدى كوزدەيتىن تۇزەتۋ ەنگىزىلەتىن بولادى. زاڭ جوبالارى پالاتانىڭ قاراۋىنا جىبەرىلدى.