«نۇرلى جول» ۆوكزالىندا جاڭا شەكتەۋلەر ەنگىزىلەدى

الداعى 17 ماۋسىمنان باستاپ تەمىر جول قىزمەتكەرلەرى جولاۋشىلاردى تەك Ashyq قوسىمشاسى ارقىلى عانا كىرگىزەدى. ۆەدومستۆوارالىق كوميسسيا تاراتقان مالىمەتكە سايكەس, ۆوكزالدىڭ بارلىق كىرەبەرىسىندە QR-كود ورناتىلادى. ونى Ashyq, Kaspi.kz, Homebank مەن Aitu قوسىمشالارى ارقىلى سكانەردەن وتكىزىپ, جەكە ستاتۋستى انىقتاۋعا بولادى.

«ەگەر جولاۋشىدا قوسىمشا بولماسا, وندا ۆوكزال قىزمەتكەرىنە جسن-دى ايتۋ كەرەك. ول Ashyq قوسىمشاسى ارقىلى ادامنىڭ ستاتۋسىن ءوزى كورەدى. شەتەلدىكتەردىڭ ستاتۋسى دا تولقۇجاتتىڭ نومىرىمەن تەكسەرىلەدى. ال 18 جاسقا تولماعان بالالار تەكسەرىستەن وتپەيدى», دەيدى ماماندار.

 «قىزىل» جانە «سارى» ستاتۋسى شىققان جولاۋشىلار ۆوكزالعا كىرە المايدى. وسىعان بايلانىستى ماماندار ashyq.kz بەيتاراپ QR-كود ارقىلى جەكە ستاتۋستى تەكسەرىپ الۋعا كەڭەس بەرىپ وتىر.

ەسكە سالا كەتەيىك, Ashyq قوسىمشاسى كارانتين جاعدايىندا كاسىپكەرلىك نىسانداردىڭ جۇمىسىن ءارى قاراي جۇرگىزۋ ءۇشىن جاسالعان ەدى. نەگىزگى ماقسات – ۆيرۋستىڭ تارالماۋىنا جول بەرمەۋ. قوسىمشادا ءتورت ستاتۋس بار. ولار:  

جاسىل  – پتر-تەست تاپسىرعان جانە تەرىس ناتيجەسى بار ادام;

كوك – پتر-تەستى جوق, ۆيرۋس جۇقتىرعاندارمەن بايلانىستا بولماعاندار;

سارى – ناۋقاسپەن بايلانىستا بولعان ادام;

قىزىل – پتر-تەست وڭ ناتيجە شىققان ادام.