اتىراۋدا وتىنىشتەردى قاراۋ ءتارتىبى ءتۇسىندىرىلدى

وبلىس اكىمىنىڭ ءبىرىنشى ورىنباسارى سەرىك ايداربەكوۆتىڭ توراعالىعىمەن وتكەن جيىنعا اكىمدىكتەگى جاۋاپتى سالا ماماندارى, دەپارتامەنتتەر, قۇقىق قورعاۋ ورگاندارى, باسقارما جانە ءتيىستى مەكەمە باسشىلارى, اۋدان اكىمدەرى, سونداي-اق سەلەكتورلىق رەجيمدە اۋىلدىق وكرۋگ اكىمدەرى قاتىستى. وندا وسى جىلدىڭ 1 شىلدەسىندە كۇشىنە ەنەتىن قر اكىمشىلىك راسىمدىك-پروتسەستىك كودەكسكە سايكەس, وتىنىشتەردى قاراۋدى جەتىلدىرۋ ماقساتىندا جاڭا فورماتقا كوشۋ ماسەلەسى قارالدى.

«قازىر اتىراۋ قالاسى مەن بارلىق اۋداندا سەرۆيستىك اكىمدىك جۇمىس ىستەۋدە. سونىمەن قاتار كودەكس تالاپتارىن ءتۇسىندىرۋ بويىنشا بارلىق مەملەكەتتىك قىزمەتشى وقۋدان ءوتىپ, ءتيىستى سەرتيفيكاتتارىن الدى. «ە-ءوتىنىش» اقپاراتتىق جۇيەسىنە 213 مەملەكەتتىك مەكەمە قوسىلىپ, وتىنىشتەردى وڭدەۋ جۇمىستارى ۇيىمداستىرىلۋدا. جالپى ازاماتتاردىڭ قۇقىقتارىن قورعاۋ باعىتىندا قابىلدانعان رەفورمالاردىڭ ماڭىزدىلىعىن ەسكەرە وتىرىپ, الداعى ۋاقىتتا بۇل جۇمىستار اكىمدىكتىڭ تىكەلەي باقىلاۋىندا بولادى», دەدى سەرىك ايداربەكوۆ.

ونىڭ ايتۋىنشا, تۇرعىنداردان تۇسكەن وزەكتى وتىنىشتەر نەگىزىنەن جەر جانە تۇرعىن ءۇي, جۇمىسپەن قامتۋ, الەۋمەتتىك كومەك كورسەتۋ, ءبىلىم بەرۋ مەن دەنساۋلىق ساقتاۋ ماسەلەلەرى بويىنشا تىركەلگەن.

ال, قر پرەزيدەنتى اكىمشىلىگىنىڭ وتىنىشتەردى قاراۋدى باقىلاۋ ءبولىمىنىڭ مەڭگەرۋشىسى تامارا دۇيسەنوۆا قر اكىمشىلىك راسىمدىك-پروتسەستىك كودەكسىنە ساي وتىنىشتەردى جاڭاشا قاراۋ ءتارتىبىن جان-جاقتى ءتۇسىندىرىپ بەردى.

ء«بىرىنشى توقساندا پرەزيدەنت اكىمشىلىگىنە 449 مىڭنان استام ارىز تۇسكەن. مۇنىڭ ىشىندە 50 پايىزى جەرگىلىكتى اتقارۋشى ورگاننىڭ ۇلەسىنە تيەسىلى» دەيدى تامارا دۇيسەنوۆا.

ونىڭ مالىمەتىنشە, كودەكس تالاپتارىنا ساي, بۇرىن ارىز 30 كۇن ىشىندە قارالاتىن بولسا, ەندى 15 كۇندە قارالاتىنىن جانە ءار تۇسكەن ارىزعا اكىمشىلىك ءىس اشىلادى. ال, وبلىستا جىل باسىنان بەرى جەرگىلىكتى اتقارۋشى ورگاندارعا 16 مىڭعا جۋىق ءوتىنىش ءتۇسىپ, ونىڭ 20 پايىزى قاناعاتتاندىرىلعان. وتىنىشتەردىڭ قالعانىنا زاڭعا سايكەس تۇسىنىكتەمە بەرىلگەن.