نۇر-سۇلتاندا تۇرمىستىق زورلىق-زومبىلىق تومەندەپ, قىلمىستىڭ اشىلۋ كورسەتكىشى جاقساردى. سوڭعى 5 ايدىڭ قورىتىندىسى بويىنشا قىلمىستاردى تىركەۋ شامامەن 40%-عا تومەندەدى. بۇل تۋرالى نۇر-سۇلتان قالاسى پوليتسيا دەپارتامەنتىنىڭ جەرگىلىكتى پوليتسيا قىزمەتىنىڭ باستىعى ارمان ايتماعامبەتوۆ ءمالىم ەتتى, دەپ حابارلايدى قالا اكىمدىگىنىڭ رەسمي سايتى.
ونىڭ ايتۋىنشا الدىن الۋ جۇمىستارىنىڭ كۇشەيۋى ناتيجەسىندە ماس كۇيىندەگى قىلمىستار 37,7%-عا تومەندەگەن. قىلمىس دەڭگەيى 10 مىڭ تۇرعىنعا شاققاندا 40,2%-عا ازايدى.
«پاندەميا جاعدايىندا حالىقتىڭ ءومىر سالتى تۇبەگەيلى وزگەردى. الەۋمەتتىك بايلانىستاردىڭ تومەندەۋى, قارجىلىق جاعدايدىڭ ناشارلاۋى ادامداردىڭ پسيحولوگيالىق جاعدايىنا تەرىس اسەر ەتتى. ماسكۇنەمدىك سالدارىنان وتباسىلىق جانە وزگە ادامدارمەن قاقتىعىستار تۋىندادى. ءبىز ەسەپتە تۇرعاندارمەن (ماسكۇنەمدەر – 1 081, ناشاقورلار – 400, وتباسىلىق جانجالدار – 3388) پروفيلاكتيكانى كۇشەيتتىك, ماسكۇنەمدىك (183) جانە ناشاقورلىق (72) باعىتى بويىنشا جۇمىستى جالعاستىرۋدامىز», دەپ مالىمدەدى ارمان ايتماعامبەتوۆ.
ونىڭ ايتۋىنشا, تۇرمىستىق قۇقىق بۇزۋشىلىقتار ءۇشىن 849 ادام جاۋاپقا تارتىلىپ, جابىرلەنۋشىلەردى قورعاۋ ءۇشىن 3388 قورعاۋ ۇيعارىمى شىعارىلدى. 275 ايەل داعدارىس ورتالىعىنا ورنالاستىرىلدى. وتباسىلىق جانجالدار بويىنشا 102 نومىرىنە تۇسكەن قوڭىراۋلاردى وڭدەۋ تاجىريبەسى ەنگىزىلدى. وسىلايشا, ۋچاسكەلىك ينسپەكتورلاردىڭ جۇمىسىنا باقىلاۋ كۇشەيتىلدى.
«ازاماتتىق باستامالاردى قولداۋ ورتالىعىمەن بىرلەسىپ تۇرمىستىق زورلىق-زومبىلىقتان زارداپ شەككەن جانە پروبلەمالى وتباسىلارعا قۇقىقتىق جانە پسيحولوگيالىق كومەك كورسەتىلەدى. 203 ادامنىڭ ءجۇرىس-تۇرىسىنا ەرەكشە تالاپتار بەلگىلەنگەن, ونىڭ ىشىندە 160-ى الكوگولدىك ىشىمدىكتەردى پايدالانۋعا تىيىم سالىنعان. مىنەز-قۇلقىنا بايلانىستى قويىلعان ەرەكشە تالاپتاردى بۇزعانى ءۇشىن 203 ادام جاۋاپقا تارتىلدى», دەدى ۆەدومستۆو باسشىسى.