تۇركىستان قالاسىندا سالىنىپ جاتقان ەكوبازار جاقىن ۋاقىتتا ىسكە قوسىلماق. بۇل – ءداستۇرلى اۋىلشارۋاشىلىق نارىعىنىڭ جانە زاماناۋي جايلى ساۋدا ورتالىعىنىڭ ارتىقشىلىقتارىن بىرىكتىرەتىن جاڭا فورماتتاعى فەرمەرلەر بازارى. 14 گەكتار جەرگە ورنالاسقان 900 ساۋدا ورنى بار جاڭا نىساننىڭ جالپى قۇرىلىس الاڭى 5 گەكتارعا جۋىق, دەپ حابارلايدى Egemen.kz.
جابىق بازار بارلىق ازىق-ت ۇلىك تاۋارلارى كوتەرمە باعامەن ساتىلاتىن ەڭ ءىرى ساۋدا ورنىنا اينالماق.
ديقاندار مۇندا ءوز ءونىمىن ساتا الادى. ول ءۇشىن بارلىق جاعداي جاسالاتىن بولادى. وبلىس اكىمى قالاداعى جاڭا عيماراتتاردىڭ اينالاسىن اباتتاندىرۋ مەن كوگالداندىرۋ جۇمىستارىن باقىلادى.
ورتالىق ستاديوننىڭ اينالاسىن اباتتاندىرۋ جۇمىستارىمەن تانىسقان وبلىس اكىمى مەردىگەرلەرگە بىرقاتار ەسكەرۋ ايتتى. جۇمىستى شيراتىپ, كەستەگە سايكەس مەرزىمىندە اياقتاۋدى مىندەتتەدى. ياسسى كوشەسى بويىنداعى جەلىلىك ساياباق پەن دەنروباقتا بولىپ, مەردىگەرلەرمەن كەزدەستى. «تۇركىستان قالالىق ساياباقتىڭ» جالپى اۋدانى 28 گەكتارعا جۋىق. دەندروباق اۋماعىندا 12 مىڭنان استام اعاش وتىرعىزىلىپ, 2360 ش.م. اۋماعىنا گۇلدەر, 20 مىڭنان استام ش.م. اۋماعىنا كوگالداندىرۋ جۇمىستارى جوسپارلانعان.
بۇگىنگى تاڭدا الۋان ءتۇرلى اعاشتار ەگىلىپ, اسفالت, اياق جول توسەلگەن. ورىندىقتار مەن قوقىس جاشىكتەرى ورناتىلعان. جارىقشامدار قويىلىپ, گازون مەن سۋارۋ جۇيەسى جۇرگىزىلگەن.
دەندروباق اۋماعىنان سىيىمدىلىعى 200 مىڭ تەكشە مەتردەن اساتىن سۋ ايدىنىنىڭ قۇرىلىسى جۇرۋدە. جاساندى كول 4,5 گەكتار اۋماققا جايعاسادى. سۋ ايدىنى بوگەن سۋ قويماسىنان كەلەتىن ارىس – تۇركىستان كانالى ارقىلى قامتاماسىز ەتىلەدى.