تۇركىستان وبلىسى, ورداباسى اۋدانىندا مەكتەپتە ەمتيحان تاپسىرىپ كەلگەن سوڭ, ءوز-وزىنە قول جۇمساعان 15 جاستاعى قىزدىڭ ءولىمى بويىنشا تەرگەۋ باستالدى, دەپ حابارلايدى Egemen.kz.
«مارقۇم بولعان ەلۆيرا مىقتىبەكتىڭ ەمتيحان كەزىندە شىعارعان ەسەپتەرىنىڭ ءبارىن قاراپ جاتىرمىز. زەردەلەۋ ءجۇرىپ جاتىر. قورىتىندىسىن, ناتيجەسىن بىتكەننەن كەيىن ايتامىز. بىزبەن بىرگە قازىر تەرگەۋ ورىندارى دا جۇمىس جۇرگىزىپ جاتىر. سونداي-اق مەكتەپتىڭ جاعدايى بۇگىنگە دەيىنگى, مورالدىق پسيحولوگيالىق جاعدايى, قايعىلى وقيعانىڭ نەدەن تۋىنداعانىن, سونىڭ ءبارىن قورتىندىسىمەن ايتامىز», دەيدى تۇركىستان وبلىستىق ادامي الەۋەتتى دامىتۋ باسقارماسىنىڭ ءبولىم باسشىسى الىبەك كەنجەباەۆ.
قازىر وسى وقيعا بويىنشا ءوڭىردىڭ پوليتسيا دەپارتامەنتى ء«وزىن-ءوزى ولتىرۋگە دەيىن جەتكىزۋ» بابىمەن قىلمىستىق ءىس قوزعاپ, تەرگەۋ امالدارىن جۇرگىزۋدە. تەرگەۋشىلەر وقيعا بولعان كۇننەن بەرى اۋىل مەكتەبىندە اتا-انالار, وقۋشىلار مەن مەكتەپ ۇجىمىنان جاپپاي جاۋاپ الۋدا. ءوڭىردىڭ باس پوليتسەيى قايرات دالبەكوۆ وسى ءىستى ءوز باقىلاۋىنا العانىن حابارلادى.
«اتا-انا ءۇشىن بالاسىنىڭ قازاسى قانشالىقتى قابىرعانى قايىستىراتىنىن جاقسى تۇسىنەمىن جانە سىزدەردىڭ قايعىلارىڭىزعا ورتاقپىن. سوندىقتان ايتايىن دەگەنىم, بۇل ءىس مەنىڭ جەكە باقىلاۋىمدا تۇر. قىزمەتكەرلەرگە تياناقتى تاپسىرمالار بەرىلدى. ياعني, اتالعان جايت بويىنشا تۇركىستان وبلىسى پوليتسيا دەپارتامەنتىنىڭ بىلىكتى تەرگەۋشىلەرىمەن قر قك-ءنىڭ 105-بابى ء«وزىن-ءوزى ولتىرۋگە دەيىن جەتكىزۋ» بويىنشا سوتقا دەيىنگى تەرگەۋ جۇمىستارى جۇرگىزىلۋدە جانە قاجەتتى دەگەن بارلىق جان-جاقتى شارالار جۇزەگە اسىرىلۋدا. ونىڭ ىشىندە مەكتەپ ۇجىمىنان, مۇعالىمدەر مەن وقۋشىلاردان جاۋاپتار الىنۋدا. ءتيىستى ساراپتامالار دا تاعايىندالدى. ءىستىڭ زاڭ اياسىندا جۇرگىزىلۋى قاداعالاۋدا», دەلىنگەن قايرات دالبەكوۆتىڭ حابارلاماسىندا.