مەملەكەتتىك ايىپتاۋشى سوتتان دەنساۋلىق ساقتاۋ ەكس-ءمينيسترى ەلجان ءبىرتانوۆتىڭ ۇيقاماق مەرزىمىن 2021 جىلدىڭ 14 شىلدەسىنە دەيىن سوزۋدى سۇرادى, دەپ حابارلايدى Egemen.kz.
«تەرگەۋ دەپارتامەنتى باسشىسىنىڭ بىرتانوۆقا قاتىستى ۇيدە قاماۋدا ۇستاۋ مەرزىمىن 9 ايعا دەيىن, ياعني 2021 جىلدىڭ 14 شىلدەسىنە دەيىن ۇزارتۋ تۋرالى ءوتىنىشى قارالىپ جاتىر. قوسىمشا ساراپتاما اياقتالدى, دەنساۋلىق ساقتاۋ مينيسترلىگىنىڭ قىزمەتكەرلەرىنەن سۇحبات الىندى, وزگە دە تەرگەۋ ارەكەتتەرى جۇرگىزىلدى.
ءوتىنىش ورىندالعان جۇمىستار اكتىسى بويىنشا مەملەكەتتىك اۋديت دەپارتامەنتىنىڭ قورىتىندىسىمەن, سونداي-اق ۇيقاماق مەرزىمىنىڭ 14 ماۋسىمدا اياقتالۋىنا بايلانىستى. ۇيقاماق مەرزىمىن 14 شىلدەگە دەيىن ۇزارتۋدى جانە قاناعاتتاندىرۋدى سۇرايمىن», دەدى سوتتا پروكۋرور تولەگەن جاراسپاەۆ
مەملەكەتتىك ايىپتاۋشى بىرتانوۆقا قاتىستى شەكتەۋ قويۋدى سۇرادى. وتباسى مۇشەلەرىنەن باسقا بارلىق اداممەن تەلەفون ارقىلى سويلەسۋگە تىيىم سالۋ, ۇيدەن شىعۋدى شەكتەۋدى سۇرادى. ونىڭ ايتۋىنشا, تەرگەۋ مەرزىمى 1 تامىزعا دەيىن ۇزارتىلادى.
«بۇرىن الىنىپ تاستالعان وسى شەكتەۋلەردى قازىرگى جاعدايلارعا بايلانىستى بەلگىلەۋ قاجەت. كۇدىكتى ءبىرتانوۆ سوتقا تىيىم سالىنعانىن ءبىلىپ, بىرقاتار بۇزۋشىلىققا بارعان. وسىعان بايلانىستى قىلمىستىق قۋدالاۋ ورگانى بۇرىن الىپ تاستالعان شەكتەۋلەردى بەلگىلەۋ تۋرالى قايتا ءوتىنىش جاسايدى. مۇندا تەك باق قىزمەتكەرلەرى بار جانە كەيبىر تەرگەۋ ارەكەتى جاريا ەتىلمەيدى. تاراپتاردىڭ ءوتىنىشى بولعاندىقتان, بۇل وتىنىشتە ءبارى جازىلعان», دەدى پروكۋرور.
ەسكە سالايىق, 21 ساۋىردە بۇرىنعى دەنساۋلىق ساقتاۋ ءمينيسترى ەلجان بىرتانوۆقا ۇيقاماق مەرزىمى ۇزارتىلدى, بىراق پاتەردەن بەلگىلى ءبىر ۋاقىتتا كەتۋگە رۇقسات ەتىلگەن بولاتىن.