الەۋمەتتىك جەلىلەردە تۇركىستان وبلىسىندا مەكتەپ ديرەكتورى 9 سىنىپ وقۋشىسىن سۋيتسيد جاساۋعا يتەرمەلەدى دەگەن اقپارات تارادى, دەپ حابارلايدى Egemen.kz Stan.kz اقپارات اگەنتتىگىنە سىلتەمە جاساپ.
ورداباسى اۋدانىنىڭ تۋماسى نۇرداۋلەت مىقتىبەكوۆ قارىنداسىنىڭ ولىمىنە مەكتەپ ديرەكتورىنىڭ تىكەلەي قاتىسى بارىن ايتىپ, ادىلدىك سۇرادى.
«قۇرمەتتى تۇركىستان وبلىسىنىڭ اكىمى ومىرزاق شوكەەۆ, قۇرمەتتى باس پروكۋرور عيزات نۇرداۋلەتوۆ, ىشكى ىستەر ءمينيسترى ەرلان تۇرعىنباەۆ, ءبىلىم ءمينيسترى اسحات ايماعامبەتوۆ, بالالار قۇقىعىن قورعاۋشى ارۋجان ساين.
2021 جىلى 2 ماۋسىم كۇنى, ءبىر اپتا بۇرىن 9 سىنىپتى بىتىرگەن قارىنداسىم مىقتىبەك ەلۆيرا ءوز-وزىنە قول جۇمسادى. قارىنداسىمدى وزىنە قول جۇمساۋعا يتەرمەلەگەن جانە ونىڭ ولىمىنە كىنالى بىردەن-ءبىر ادام – مەكتەپ ديرەكتورى ستاەۆا ايسارا نۋرجيگيتوۆنا دەپ ەسەپتەيمىن. ەلۆيرا ۇزدىك اتتەستاتتان ءۇمىتتى مەكتەپتەگى ءۇش وقۋشىنىڭ ءبىرى بولدى. الايدا ديرەكتور ۇزدىك بىتىرۋگە بارىنشا كەدەرگى كەلتىرىپ, ەمتيحاندا قىسىم كورسەتكەن», دەيدى نۇرداۋلەت مىقتىبەكوۆ.
ونىڭ سوزىنشە, مەكتەپ ديرەكتورى قارىنداسىن ەمتيحاننان كەيىن كىدىرتىپ, قىسىم كورسەتكەن. باعاسىن كەمىتەمىن دەپ قورقىتقان كورىنەدى.
«ەمتيحاندا توبەسىنەن ءتونىپ تۇرىپ باقىلاعان. «سەن ۇشكە وقيتىن وقۋشىسىڭ, سەنىڭ باعاڭدى 10 بالل كەمىتەمىن» دەپ وقۋشىلاردىڭ كوزىنشە ايتقان. ەمتيحاننىڭ سوڭىندا جەكە الىپ قالعان. نە ايتىپ, نە قىسىم جاساعانى بەلگىسىز. سىرتقا شىققاندا قارىنداسىم قاتتى ىزالانىپ, جىلاپ شىققان. بۇعان ءۇي ءىشى, مۇعالىمدەر مەن سىنىپتاستارى دا كۋا. قالعان ۇزدىك اتتەستاتقا ۇمىتكەر وقۋشىلارعا قىسىم كورسەتپەگەن. ولاردان اقشا الۋى دا مۇمكىن. اۋىل اراسىندا ونداي اڭگىمە دە بار. وسىنداي قىسىمنان كەيىن بۇعان دەيىن بەسكە وقىعان قارىنداسىم ءبىر ساباقتان ءتورت دەگەن باعا الىپ, قاتتى كۇيزەلىستەن ءۇي اۋلاسىندا ارقانعا اسىلىپ, كوز جۇمدى», دەيدى ول.
وقيعاعا بايلانىستى تۇركىستان وبلىستىق پوليتسيا دەپارتامەنتىنىڭ باسشىسى تۇسىنىكتەمە بەردى.
«اتالعان جايت بويىنشا تۇركىستان وبلىسى پوليتسيا دەپارتامەنتىنىڭ بىلىكتى تەرگەۋشىلەرىمەن قر قك-ءنىڭ 105-بابى ء«وزىن-ءوزى ولتىرۋگە دەيىن جەتكىزۋ» بويىنشا سوتقا دەيىنگى تەرگەۋ جۇمىستارى جۇرگىزىلۋدە جانە قاجەتتى دەگەن بارلىق جان-جاقتى شارالار جۇزەگە اسىرىلۋدا. ونىڭ ىشىندە مەكتەپ ۇجىمىنان, مۇعالىمدەر مەن وقۋشىلار اراسىندا جاۋاپ الىنۋدا. ءتيىستى ساراپتامالار دا تاعايىندالدى. ءىستىڭ زاڭ اياسىندا جۇرگىزىلۋىن قاداعالاپ وتىرمىز», دەيدى تۇركىستان وبلىسى پوليتسيا دەپارتامەنتىنىڭ باسشىسى ق.دالبەكوۆ.
ازىرگە ديرەكتورعا تاعىلعان ايىپ قانشالىقتى راس نەمەسە نەگىزسىز ەكەنىن ايتۋ قيىن. وقيعانىڭ ءمان-جايى انىقتالعان سوڭ قوسىمشا اقپارات بەرىلەتىن بولادى.