ۇلتتىق حالىق ساناعىن وتكىزۋ كەزىندەگى باستى ماسەلەلەردىڭ ءبىرى – ازاماتتاردىڭ جەكە قاۋىپسىزدىگى. ساناق كەزىندە ينتەرۆيۋەرلەردىڭ ەل ازاماتتارىنىڭ جەكە مالىمەتتەرىمەن تىكەلەي جۇمىس ىستەۋىنە تۋرا كەلەدى. كوپشىلىك تاراپىنان وسىعان بايلانىستى «مالىمەتتەر ءۇشىنشى تۇلعالاردان قانشالىقتى قورعالعان؟» دەگەن سۇراق تۋىنداۋى زاڭدى.
ازاماتتاردان ساناق كەزىندە الىنعان بارلىق اقپارات ۇلتتىق ستاتيستيكا بيۋروسىنىڭ ورتالىق سەرۆەرىنە جىبەرىلەدى.
ۇلتتىق ستاتيستيكا بيۋروسىنىڭ اقپاراتتىق جۇيەسى اقپاراتتىق-كوممۋنيكاتسيالىق ينفراقۇرىلىمداردىڭ اسا ماڭىزدى نىساندارىنىڭ تىزىمىنە ەنگىزىلگەن جانە ۇقك «مەملەكەتتىك تەحنيكالىق قىزمەت» اق-نىڭ تالداۋىنا الىنعان. توقسان سايىن جۇيەنىڭ وسال تۇستارىن انىقتاۋ ماقساتىندا تەكسەرۋ جۇرگىزىلىپ وتىرادى. سونداي-اق ساناق قارساڭىندا اقپاراتتىق جۇيەنىڭ قاۋىپسىزدىك تالاپتارىنا سايكەستىگى سىناقتان وتكىزىلىپ, بۇل بويىنشا وڭ ناتيجە الىنعان بولا- تىن.
ارنايى sanag.gov.kz سايتىنىڭ قورعانىشى رەتىندە سەرۆەر مەن قولدانۋشى اراسىنداعى اقپارات الماسۋ https حاتتاماسىمەن قورعالعان, الەمدەگى ءىرى سەرتيفيكاتتاۋ ورتالىقتارىنىڭ ءبىرى Sectigo SSL-سەرتيفيكاتى الىندى.
حالىق ساناعى كەزىندە مالىمەتتەردى ورتالىق سەرۆەرگە بەرۋ ەكى تاسىلمەن جۇزەگە اسىرىلادى. ءبىرىنشىسى – پلانشەتتەن ونلاين رەجىمدە قورعالعان جەلى ارقىلى (ينتەرنەتكە قوسىلماي) ۇيالى بايلانىس وپەراتورىنىڭ مالىمەتتەردى پاكەتتىك بەرۋى. مۇنداي بايلانىس ءتۇرىن ينتەرۆيۋەر بارلىق دەڭگەيدە (قالالىق, اۋداندىق, اۋىلدىق) وپەراتور قىزمەتىنىڭ بايلانىس ايماعىندا پلانشەتتى قولدانىپ جۇرگىزە الادى.
ەكىنشى ءتاسىل – ۇيالى بايلانىسى ناشار شالعاي اۋىلداردا ساۋالداما جۇرگىزۋ كەزىندە پايدالانىلادى. ينتەرۆيۋەر ءۇشىن دەرەكتەردى قورعانىس كانالى ارقىلى ورتالىق ساناق سەرۆەرىنە وفلاين رەجىمدە تىكەلەي ۇلتتىق ستاتيستيكا بيۋروسىنىڭ بىرىڭعاي ساناق بازاسىنا جىبەرۋ مۇمكىندىگى كوزدەلگەن.
جىبەرىلەتىن بارلىق فايل شيفرلانعان. «العاشقى ستاتيستيكالىق دەرەكتەردىڭ ساقتالۋى مەن قۇپيالىلىعىن قامتاماسىز ەتۋ قازاقستان رەسپۋبليكاسىنىڭ زاڭناماسىمەن رەتتەلەتىن پروتسەستەر شەڭبەرىندە قازىرگى زامانعى تەحنيكالىق قۇرالداردى پايدالانۋ ارقىلى جانە اقپاراتتىق قاۋىپسىزدىك سالاسىنداعى ۋاكىلەتتى ورگانمەن بىرگە جۇزەگە اسىرىلادى. بۇدان باسقا, «مەملەكەتتىك ستاتيستيكا تۋرالى» قازاقستان رەسپۋبليكاسى زاڭىنىڭ 8-بابى 1-تارماعىنا سايكەس العاشقى ستاتيستيكالىق دەرەكتەر قۇپيا بولىپ تابىلادى جانە ونى مەملەكەتتىك ستاتيستيكا ورگاندارى تەك ستاتيستيكالىق اقپاراتتى الۋ, جيناۋ ماقساتىندا عانا پايدالانادى. مەملەكەتتىك ستاتيستيكا ورگاندارى العاشقى ستاتيستيكالىق دەرەكتەردى جيناۋ, وڭدەۋ جانە ساقتاۋ كەزىندە ولاردىڭ قۇپيالىلىعىن قامتاماسىز ەتەدى», دەدى ۇلتتىق ستاتيستيكا بيۋروسى.
2021 جىلدىڭ ۇلتتىق ساناعىنىڭ نەگىزگى كەزەڭى 1 قىركۇيەك پەن 30 قازان ارالىعىندا جۇرگىزىلەدى. وعان ونلاين رەجىمىندە دە, ءداستۇرلى ادىسپەن دە قاتىسۋعا بولادى. 2021 جىلدىڭ ساناعىنىڭ ۇرانى – «قازاقستاندا اركىم ماڭىزدى! ۆ كازاحستانە كاجدىي ۆاجەن!».