ماۋلەن اشىمباەۆتىڭ توراعالىق ەتۋىمەن سەنات بيۋروسىنىڭ وتىرىسى بولدى, وندا دەپۋتاتتار 2021 جىلعى 10 ماۋسىمعا جوسپارلانعان جالپى وتىرىستىڭ كۇن ءتارتىبىن تالقىلادى, دەپ حابارلادى پالاتانىڭ ءباسپاسوز قىزمەتى.
الداعى وتىرىستىڭ كۇن تارتىبىنە پارلامەنت دەپۋتاتتارى باستاماشىلىق ەتكەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ينكليۋزيۆتى ءبىلىم بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەنگىزىلدى.
وسى زاڭ جوباسى قابىلدانعاننان كەيىن ەرەكشە قاجەتتىلىكتەرى بار بالالاردى وقىتاتىن ۇيىمدار ءبىلىم بەرۋ باعدارلاماسىن ءبىلىم الۋشىلار مەن تاربيەلەنۋشىلەردىڭ جەكە دامۋ ەرەكشەلىكتەرىنە جانە الەۋەتتى مۇمكىندىكتەرىنە سايكەس بەيىمدەۋى ءتيىس بولادى. قۇجات سونداي-اق مۇمكىندىگى شەكتەۋلى بالالاردى ەرتە انىقتاۋ جانە ولارعا ەرتە ارنايى پسيحولوگيالىق-پەداگوگيكالىق قولداۋ كورسەتۋ سالاسىندا مەكەمەارالىق ءوزارا ءىس-قيمىلدى كۇشەيتۋگە مۇمكىندىك بەرەدى. سەناتورلار سونداي-اق پالاتانىڭ كەلەسى وتىرىسىندا پارلامەنت دەپۋتاتتارى باستاماشىلىق ەتكەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كاسىپكەرلىك, الەۋمەتتىك كاسىپكەرلىك جانە مىندەتتى الەۋمەتتىك مەديتسينالىق ساقتاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قارايدى.
قۇجات حالىقتىڭ الەۋمەتتىك وسال توپتارىن جۇمىسپەن قامتۋدى قامتاماسىز ەتۋگە جاردەمدەسۋگە, الەۋمەتتىك پروبلەمالاردى شەشۋگە كاسىپكەرلىك سۋبەكتىلەرىنىڭ قاتىسۋىن قولداۋعا جانە الەۋمەتتىك كاسىپكەرلەردىڭ تاۋارلارىن, جۇمىستارى مەن كورسەتىلەتىن قىزمەتتەرىن نارىقتا ىلگەرىلەتۋگە باعىتتالعان.
سەنات سونىمەن قاتار سالىق كودەكسىنە جانە «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» قازاقستان رەسپۋبليكاسىنىڭ كودەكسىن قولدانىسقا ەنگىزۋ تۋرالى» قازاقستان رەسپۋبليكاسى زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن جانە «بايقوڭىر» كەشەنىنىڭ قىزمەتىنە بايلانىستى راتيفيكاتسيالىق زاڭ جوبالارىنىڭ توپتاماسىن قاراۋى ءتيىس.