وبلىستىق دەنساۋلىق ساقتاۋ باسقارماسى ءباسپاسوز قىزمەتىنىڭ مالىمەتىنشە, 3 ماۋسىمدا «Bazis Construction» جشس-ءنىڭ 23 جۇمىسشىسى تۇسكى استان ۋلانىپ قالعان, دەپ حابارلايدى Egemen.kz.
اتالعان سەرىكتەستىك گاز-حيميا كەشەنىنىڭ قۇرىلىسىن جۇرگىزىپ جاتىر. ال, تاماقتان ۋلانعان جۇمىسشىلار №2 وبلىستىق ينفەكتسيالىق اۋرۋحاناسىنا جاتقىزىلدى.
«ينفەكتسيالىق اۋرۋحاناعا 3 ماۋسىمدا ساعات 19:45-تە 21 جۇمىسشى, 4 ماۋسىمدا ساعات 01:00-دە تاعى 2 ادام ءتۇستى. اۋرۋحاناعا جاتقان ناۋقاستاردىڭ بارىندە ۋلانۋ بەلگىلەرى بايقالدى. ناۋقاستار باس اينالۋ, قۇسۋ, السىزدىك جانە ديارەيا بەلگىلەرىنە شاعىمدانعان» دەپ ءمالىم ەتتى باسقارمانىڭ ءباسپاسوز قىزمەتىنەن.
جۇمىسشىلار «Bazis Construction» جشس-ءنىڭ اسحاناسىندا تاماقتانىپتى. ولارعا الدىن الا قويىلعان دياگنوز – تاعامدىق توكسيكوينفەكتسيا.
«جۇمىسشىلارعا تۇسكى استا مانپار, بۇرشاق سورپالارى, سيىر ەتىنەن دايىندالعان تاعام, قايناتىلعان شۇجىق, پىسىرىلگەن تاۋىقتىڭ ءتوس ەتى, قايناتىلعان قاراقۇمىق, ماكارون, قىرىققابات سالاتى ۇسىنىلعان. ولار ۋلانۋدى تۇسكى اسپەن بايلانىستىرادى» دەپ حابارلادى باسقارمانىڭ ءباسپاسوز قىزمەتى.