اكىمنىڭ سالعىرتتىعى: جول اپاتىنان ەكى ەرەسەك ادام مەن بالا قايتىس بولدى

قايعىلى وعيعا 16 مامىر كۇنى ساعات 23:00-دە ورال-اتىراۋ تاس جولىنىڭ 75 شاقىرىمىندا بولعان. وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتىنشە, ۆاز-21113 اۆتوكولىگى ەكى جىلقىمەن سوقتىعىستى. اپات سالدارىنان جەڭىل اۆتوكولىكتىڭ 54 جاستاعى جۇرگىزۋشىسى, ونىڭ 85 جاستاعى اكەسى مەن 13 جاستاعى بالاسى العان جاراقاتتارىنان وقيعا ورنىندا كوز جۇمدى.

قازىرگى تاڭدا جول فاكتىسى بويىنشا پوليتسەيلەر قر قك 345-بابى «جول قوزعالىسى ەرەجەلەرىن بۇزۋ» بويىنشا سوتقا دەيىنگى تەرگەۋدى باستادى.

«تۇنگى ۋاقىتتا, اسىرەسە, قاراۋسىز قالعان مالدارعا قاتىستى كەلەڭسىز جايتتار ازايماي وتىر. وسىعان بايلانىستى مال جايۋ ەرەجەلەرىن بۇزعانى ءۇشىن 916 مال يەسى اكىمشىلىك جاۋاپكەرشىلىككە تارتىلدى. وسى سەكىلدى جايتتاردىڭ الدىن الۋ ماقساتىندا «ەلەكتروندى باقتاشى» جۇيەسى قولعا الىندى. سول ارقىلى ولاردىڭ ورنالاسقان جەرىن انىقتاۋعا بولادى. الايدا كوبىنە-كوپ مال يەلەرى اتالعان مىندەتتەمەردى ورىنداماي, ايىپپۇل تولەپ جاتادى», دەيدى وبلىستىق پد باسشىسىنىڭ ورىنباسارى جانبولات جانشين.

ەسكە سالا كەتەيىك, بيىل اقجايىق اۋدانىنىڭ ماڭىندا 17 جول كولىك وقيعاسى بولىپ, 20 ادام قايتىس بولعان ەدى. ولاردىڭ 40-ى ءتۇرلى دارەجەدەگى جاراقات الىپ, اۋرۋحاناعا جەتكىزىلگەن ەدى.

بۇعان دەيىن وبلىس اكىمى عالي ەسقاليەۆ اۋدان اكىمدەرىنە ءۇي جانۋارلارىنىڭ قاتىسۋىمەن بولاتىن جكو-عا جول بەرمەۋ بويىنشا شارالار قابىلداۋ قاجەتتىگى تۋرالى ەسكەرتكەن-ءدى.

«رەسپۋبليكالىق تراسسالاردىڭ بويىندا ورنالاسقان اۋدان اكىمدەرىنە ءۇي جانۋارلارىنىڭ قاتىسۋىمەن بولاتىن جكو-عا جول بەرمەۋ جونىندە شارالار قابىلداۋ قاجەتتىگى تۋرالى ەسكەرتكەن ەدىم. بۇل اۋدان اكىمدەرىنىڭ تىكەلەي مىندەتى, وسىعان بايلانىستى اقجايىق اۋدانىنىڭ اكىمىنە سوگىس جاريالايمىن. ەكى ايدان كەيىن تاعى قاراستىرامىز. سونداي-اق ۆەتەريناريا باسقارماسىنىڭ جۇمىسى ناشار ەكەنىن اتاپ وتكىم كەلەدى. 2020 جىلى مالدىڭ قاتىسۋىمەن بولعان 49 اپاتتىڭ 43-ىندە مال يەلەرى انىقتالماعان. ۆەتەريناريا باسقارماسىنىڭ باسشىسىنا قاتىستى قىزمەتتىك تەرگەۋ جۇرگىزىلەتىن بولادى», دەپ مالىمدەدى عالي ەسقاليەۆ.

ايتا كەتەيىك, رەسمي دەرەكتەرگە سايكەس بيىل وبلىس جولدارىندا 99 اپات بولىپ, 43 ادام كوز جۇمدى. تاعى 157 ادام ءتۇرلى دارەجەدەگى جاراقات الدى. 99 اپاتتىڭ ەكى جاعدايىندا جول-كولىك وقيعاسىنىڭ سەبەپتەرى ءۇي جانۋارلارى بولعان. ءتورت ادام قازا تاۋىپ, تاعى ەكەۋى جاراقات الدى.