ەلوردانىڭ مونيتورينگتىك توپتارى بىرنەشە اي بويى كۇشەيتىلگەن رەجيمدە جۇمىس ىستەپ, قالانىڭ كاسىپكەرلىك نىساندارى اراسىندا كارانتين تالاپتارىن بۇزۋشىلاردى انىقتاپ كەلەدى. بۇل شەكتەۋ شارالارىن ساقتامايتىن مەكەمەلەر سانىن ازايتۋعا سەپتىگىن تيگىزۋدە, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
كەشە, ياعني 2 ماۋسىم كۇنى مونيتورينگ توپتارى ءتورت مەكەمەنى اكىمشىلىك جاۋاپكەرشىلىككە تارتتى.
الماتى اۋدانىنىڭ بالقانتاۋ كوشەسىندە ورنالاسقان «يسكەندەر» ساۋناسى مەن سىرا پابى كارانتين تالاپتارىن بۇزعانى انىقتالدى.
سارىارقا اۋدانىندا ورنالاسقان «Insane» PS كلۋبى جۇمىس رەجيمىنىڭ ساعات 23:00-گە دەيىن شەكتەلگەنىنە قاراماستان, ءتۇن ورتاسىنا دەيىن جۇمىس ىستەدى. وسىعان ۇقساس ءتارتىپ بۇزۋشىلىقتى بايقوڭىر اۋدانىنداعى «Faiz» كافەسى دە جاسادى.
جينالعان ماتەريالدىڭ ءبارى ءتيىستى شارالار قابىلداۋ ءۇشىن اۋداندىق سانيتارلىق-ەپيدەميولوگيالىق باقىلاۋ باسقارماسىنا تاپسىرىلدى.
ەستەرىڭىزگە سالا كەتەيىك, نۇر-سۇلتان ەپيدەميولوگيالىق جاعدايدى باعالاۋ ماتريتساسى بويىنشا «قىزىل» ايماققا ەنگەنىنە ءۇش ايعا جۋىقتادى. قالاداعى ەپيدەميولوگيالىق جاعداي تۇراقسىز بولىپ قالۋدا. سول سەبەپتى ەلوردا تۇرعىندارى مەن قوناقتارى, سونداي-اق كاسىپكەرلىك نىساندارى كوروناۆيرۋستىق ينفەكتسيانىڭ ودان ءارى تارالۋىن بولدىرماس ءۇشىن سانيتارلىق نورمالار مەن كارانتين تالاپتارىن قاتاڭ ساقتاۋى كەرەك.