دانيار ەلەۋسىنوۆ كاسىپقوي بوكسقا اۋىسقاننان كەيىن قازاقستان قۇراماسىنىڭ جاڭا كاپيتانى رەتىندە باپكەرلەر القاسى ءبىراۋىزدان ادىلبەك نيازىمبەتوۆتى تاعايىنداعان بولاتىن. وسى جونىندە ۇلتتىق قۇرامانىڭ باس جاتتىقتىرۋشىسى مىرزاعالي ايتجانوۆ ءوز پىكىرىن ءبىلدىردى. بۇل تۋرالى sports.kz حابارلادى.
«ادىلبەكتىڭ كانديداتۋراسىن ۆاسيلي لەۆيت ۇسىنعان ەدى. نيازىمبەتوۆ وسى مىندەتكە لايىق دەگەن پىكىرگە كەلگەندىكتەن, قابىل الدىق. سەبەبى, تاجىريبەسى دە, جەتىستىكتەرى دە كوپ, سونداي-اق ارىپتەستەرىنىڭ اراسىندا بەدەلى دە جوعارى. بۇل جاۋاپكەرشىلىكتى توكيو وليمپياداسىنا دەيىن لايىقتى اتقاراتىنىنا سەنىمدىمىن ونىڭ باستى مىندەتى – قيىن كەزدە كومانداعا جىگەر بەرىپ, اۋىزبىرشىلىكتى ودان ءارى نىعايتۋ», – دەدى مىرزاعالي ايتجانوۆ.
ايتا كەتەيىك, جاڭارعان بوكس قۇراماسى 25 قاڭتارعا دەيىن دۇنيەجۇزىلىك بوكس اكادەمياسىندا جالپى فيزيكالىق دايىندىق جيىنىن وتكىزدى. جاقىن ارادا ولار ۆەنگريا مەن بولگاريادا وتەتىن ءداستۇرلى تۋرنيرگە قاتىسادى. ال 6-20 اقپان كۇندەرى اكادەميادا اقش, گەرمانيا بوكسشىلارىمەن بىرگە جاتتىعادى.