بىلتىر ۇكىمەت باسشىسى اسقار مامين مەن تاتارستان پرەزيدەنتى رۋستام ميننيحانوۆ توبىل وڭىرىنە جۇمىس ساپارىمەن كەلىپ, وسىندا «KamLitKZ» شويىن زاۋىتى مەن جۇك تەحنيكالارىنا ارنالعان جەتەكشى بەلدەمە زاۋىتىنىڭ ىرگەتاسىن قالاۋ راسىمىنە قاتىسقان ەدى. رەسمي جيىندا زاۋىت قۇرىلىسىنىڭ 2-3 جىل ىشىندە اياقتالاتىنى ايتىلعان.
وسى زاۋىتتاردا جۇمىس ىستەيتىن مامانداردى وقىتۋ ءىسى قازىردەن باستاپ قولعا الىندى. ماشينا جاساۋ سالاسىنا قاجەتتى ساپالى مامانداردى دايارلاۋ ءۇشىن قوستاناي اۆتوجول كوللەدجى تاڭدالىپ الىنىپ, وقۋ ورنىنا جايلى جاتاقحانا مەن زاماناۋي زەرتحانا سالىپ بەرۋ ءۇشىن وبلىس بيۋدجەتىنەن 400 ملن تەڭگە قارجى ءبولىندى.
سونداي-اق بىلتىر قوستاناي اۆتوجول كوللەدجىندە «كاماز» جوباسى اياسىندا «قارا مەتالدار مەتاللۋرگياسى», «مەحانيكالىق وڭدەۋ», «ونەركاسىپتەگى باقىلاۋ-ولشەۋ اسپاپتارى جانە اۆتوماتيكا», «توكارلىق ءىس جانە مەتالل وڭدەۋ», «ماشينا جاساۋ تەحنولوگياسى», «اۆتوماتتاندىرۋ جانە باسقارۋ» سياقتى جاڭا ماماندىقتار اشىلعان. بۇل ماماندىقتار بويىنشا بيىل ءبىرىنشى كۋرستى 125 ستۋدەنت ءتامامداپ وتىر. كوللەدج ديرەكتورى دميتري پاۆلەنكونىڭ ايتۋىنشا, الداعى وقۋ جىلىندا تاعى 125 ستۋدەنت وقۋعا قابىلدانباق.
وڭىردە جۇزەگە اسىرىلا باستاعان اۋقىمدى جوبالار اياسىندا كولىك قۇراستىرۋ سالاسىنا قاتىستى بەس بىردەي جاڭا ماماندىق اشقان ءبىلىم ورداسىنا وتكەن اپتادا «كاماز» جاق باس ديرەكتورىنىڭ ءبىرىنشى ورىنباسارى يۋري گەراسيموۆ ارنايى كەلىپ, وقۋ ورنىمەن ءوزارا ىنتىماقتاستىق جونىندە كەلىسىمگە قول قويدى.
– ءبىز قوستانايداعى «KamLitKZ» زاۋىتى مەن جەتەكشى بەلدەمە زاۋىتىنىڭ ىسكە قوسىلۋىن اسىعا كۇتىپ وتىرمىز. قازىر بىرلەسكەن جوبا كەزەڭ-كەزەڭىمەن ۋاقتىلى جۇزەگە اسىرىلىپ جاتىر. ەڭ باستىسى, بۇل زاۋىتتاردا جۇمىس ىستەيتىن بولاشاق ماماندار دايارلاۋ ماسەلەسىن قاتار قولعا الدىق. ماشينا قۇراستىرۋ سالاسىنىڭ ماماندارى بىزگە اسا قاجەت. ءبىز «كاماز» كولىكتەرىن شىعاراتىن بولساق, كوللەدج سول كولىكتى قۇراستىراتىن مامانداردى دايارلايدى. قازىر كوللەدجدە 300-گە جۋىق ستۋدەنت ءبىلىم الىپ جاتىر. ءوز جاتاقحاناسى بار. ونىڭ قۇرىلىسىنا 1 ملرد 300 ملن تەڭگە باعىتتالىپ وتىر. ياعني جان-جاقتى قولداۋ كورسەتىلىپ جاتىر. مەن بۇگىنگى كوللەدج ستۋدەنتتەرىنىڭ ءبىر-ەكى جىلدان سوڭ جاڭا زاۋىتقا جۇمىسقا ورنالاسىپ, ودان ءارى كاسىپورىننىڭ بىلىكتى مامانى بولىپ شىعاتىنىنا سەنىم بىلدىرەمىن, – دەدى «كاماز» جاق باس ديرەكتورىنىڭ ورىنباسارى.
قوستانايدا جاڭا سالىنىپ جاتقان «KamLitKZ» شويىن زاۋىتى مەن قۇرىلىسىنىڭ ءبىرىنشى كەزەڭى بيىل قازان ايىندا اياقتالادى. زاۋىت 2023 جىلى تۇبەگەيلى سالىنىپ بىتەدى دەپ جوسپارلانىپ وتىر. قۇنى 80 ملرد تەڭگە بولاتىن اۋقىمدى جوبا ىسكە قوسىلسا, مۇندا 300-دەن استام جاڭا جۇمىس ورنى پايدا بولماق.
اتالعان زاۋىتتا كەيىنگى بۋىندى «كاماز» جانە باسقا دا اۋىر جۇك كولىكتەرى ءۇشىن شويىننان قۇيىلعان بەلدەمە كارتەرلەرى, تسيليندر بلوكتارى مەن قوزعالتقىش ءتسيليندرى بلوگىنىڭ باستيەكتەرى شىعارىلادى. كاسىپورىن وندىرىستىك قۋاتىنا تولىق كوشكەن سوڭ, مۇندا جىلىنا جالپى كولەمى 40 مىڭ توننادان استام اۋىر جۇك كولىكتەرىنە ارنالعان شويىن قوسالقى بولشەك جاسالادى. ونىڭ 95 پايىزىن ەكسپورتقا جونەلتۋ كوزدەلىپ وتىر.
قوستاناي وبلىسى