بۇگىن ساياسي قۋعىن-سۇرگىن قۇرباندارىن ەسكە الۋ كۇنىنە وراي وسكەمەن شاھارىندا كورنەكتى اقىن, الاش قايراتكەرى شاكارىم قۇدايبەردى ۇلىنىڭ ءبيۋستى اشىلدى, دەپ حابارلايدى Egemen.kz.
ايتا كەتسەك, وسكەمەندە بۇل الاش قايراتكەرلەرىنە قويىلعان العاشقى ءمۇسىن. بيۋست قالاداعى شاكارىم اتىنداعى №1 مەكتەپتىڭ الدىنا ورناتىلدى. سانيتارلىق تالاپتاردى ساقتاي وتىرىپ ۇيىمداستىرىلعان شاراعا شىعىستىڭ زيالى قاۋىمىمەن قاتار, قالا باسشىلىعى دا قاتىستى.
«اسان بولىپ تۋىپ قازاقتار, ولەدى اسان قايعى بولىپ» دەيدى. مىنە, ءبىر عاسىر ءوتىپ كەتتى. ءالى كۇنگە دەيىن جىلاعىمىز كەلەدى. بۇل دەگەن ۇلكەن قاسىرەتتىڭ سينتەزى. شاكارىم تۋرالى تۇگەندەپ ايتپاي-اق قويايىن. ءبىز تاۋەلسىزدىكتىڭ كەمشىلىكتەرىنە كوپ توقتالامىز. باستى جەتىستىگىمىز, ەركىن سويلەيمىز, ەركىندىككە قولىمىز جەتتى. وسىنى ءبىز كوپ جاعدايدا ەسكەرە بەرمەيمىز. ارىعا بارماي-اق قويايىن, وسىدان وتىز جىل بۇرىن وسكەمەندە رەپرەسسيا قۇرباندارىن ىزدەگەندى قويىپ, كوشەدە قازاقشا سويلەۋگە زار ەدىك. ۇيدە كورپەنىڭ استىندا كۇبىرلەپ, قازاق ەكەنىمىزدى ايتاتىنبىز. شاكارىمنىڭ ءمۇسىنى ورناپ جاتىر ەكەن, بۇل تاۋەلسىزدىكتىڭ ارقاسى», دەدى جازۋشى الىبەك قاڭتارباەۆ سالتاناتتى جيىندا.
ءمۇسىننىڭ بوي كوتەرۋىنە مۇرىندىق بولعان مەكتەپتىڭ ديرەكتورى ءادىل سايلاۋبەك ۇلى. ۇسىنىستى قامقورشىلىق كەڭەس قولداپ, دەمەۋشىلەردىڭ كومەگىمەن ۇلى تۇلعانىڭ ءبيۋستى سوعىلدى.
ەسكەرتكىشتىڭ اۆتورى شىعىستىڭ بەلگىلى سۋرەتشىسى, ءمۇسىنشى ەركەبۇلان جاكىشوۆ.