«قىزىل ايماقتىڭ» سالدارى ءالى از ەمەس

وسى شەكتەۋ شارالارىنا وراي وبلىستىڭ باس سانيتار دارىگەرى باتىربەك اليەۆ جاڭا №10 قاۋلىعا قول قويدى. بۇعان دەيىن ءبىر اپتا بويى ەپيدەميالىق جاعداي باقىلاۋدا بولدى. ياعني 17 – 25 مامىر ارالىعىندا احۋال تۇراقتى ەكەنىن كورسەتىپ, شەكتەۋ شارالارىن جەڭىلدەتۋگە قاتىستى قاۋلى قابىلداندى.

– وبلىستا ىندەت جۇقتىرۋشى­لاردىڭ سانى ازايۋدا. 10-16 مامىر ارالىعىندا 698 جاعداي انىقتال­سا, قازىر بۇل كورسەتكىش تومەندەدى. 24 مامىر كۇنى 75 ىندەت جۇقتىرۋ جاعدايى تىركەلدى. تاۋلىكتىك ءوسىم 0,4 پايىزدى قۇرادى, – دەدى ب.اليەۆ.

بۇعان دەيىن وبلىس اۋماعى ىن­دەتتىڭ تارالۋى بويىنشا «قىزىل ايماق­تا» بولعان كەزدە, باس سانيتار­لىق دارىگەردىڭ قاۋلىسىمەن تەاتر­لار مەن كينوتەاترلاردىڭ جۇمىسى­نا تىيىم سالىنعان-دى. ەندى «سا­رى ايماقتاعى» جاڭا قاۋلى ءتارتىبى بويىنشا كورەرمەندەرگە مادەني ورىندارعا بارۋعا رۇقسات بەرىلدى, بىراق زالدىڭ تولىمدىلىعى ادام سانىنىڭ 20 پايىزىنان اسپاۋى قا­جەت. سونىمەن بىرگە ءدامحانالار مەن مەيرامحانالار قىزمەتى بۇعان دەيىن جۇمىس كەستەسى 9:00-دەن 20:00-گە دەيىن بولسا, ەندى ساعات 7:00-دەن 24:00-گە دەيىن ۇزارتىلىپ, ادام­داردىڭ كەلۋى 50 ورىننان اسپاۋى ءتيىس دەپ بەكىتىلدى. دەمالىس كۇندەرى كەلۋشىلەرگە ساۋدا ۇيلەرى, سپا-ورتا­لىقتار, باسسەيندەر, جابىق بازارلار اشىق, ال سەنبى كۇندەرى ساۋنالارعا بارۋعا رۇقسات ەتىلدى, مونشالاردىڭ دا جۇمىس ۋاقىتىنان شەكتەۋلەر الىندى. اۋدانارالىق جولاۋشىلار اۆتوبۋسى مەن شاعىن اۆتوبۋستار دا شەكتەۋلەردەن كەيىن تاسىمالىن باستادى. جەرگىلىكتى تۇرعىنداردىڭ كۇننىڭ ىستىعىندا باياناۋىلعا, ەر­تىس جاعالاۋىنداعى تۋريستىك دەمالىس ورىندارىنا بارعىلارى كەلەتى­نى بەلگىلى. جاز مەزگىلىنىڭ دەمالىس ۋاقىتى ەكەنى ەسكەرىلىپ, تۋريستىك ورىن­دارعا سانيتارلىق تالاپتاردى قا­تاڭ تۇردە ساقتاي وتىرىپ, قىزمەت كورسەتۋگە رۇقسات بەرىلدى.

وسى ۋاقىتقا دەيىن وبلىستا 22 900 ادامنان ىندەت جۇقتىرۋ انىق­تالسا, 21 092 تۇرعىن جازىلىپ شىققان. ەكپە جاعدايىنا كەل­سەك, سپۋتنيك V العاشقى كوم­پونەنتىن – 73 595, ەكىنشى دوزانى 33 376 ادام قابىلداعان. وتاندىق ۆاك­تسي­نانىڭ ءبىرىنشى كومپونەنتىن – 1 008, ەكىنشىسىن 811 تۇرعىن سالدىرسا, Hayat-Vax ەكپەسىن 2 846 ادام العان. ىندەتتەن جازىلىپ شىق­قان تۇرعىندار قوسىمشا ەم-شارا قا­بىلداي الادى. قازىر وڭىردە ىندەت جۇق­تىرعان 250-گە جۋىق ناۋقاس قو­سىمشا ەم قابىلداپ, دەنساۋلىعىن جاقسارتقان, «بۋراباي» شيپاجايىنا دا جولداما ارقىلى بارا الادى. ەم-شارالارى مىندەتتى الەۋمەتتىك مەديتسينالىق ساقتاندىرۋ جۇيەسى بويىنشا تەگىن جۇرگىزىلەدى. وڭىردەگى بارلىق اۋرۋحانا مەن ەمحانادا ­تاۋ­لىك بويى قىزمەت كورسەتەتىن ستا­تسيو­­نارلاردا 1 299 ادام وڭالتۋ شا­­را­­لارىنا بارىپ, دەنساۋلىعىن جاق­سارتقان. ال وبلىستىق دەنساۋلىق ساق­تاۋ باسقارماسىنىڭ باسشىسى ايدار سەيىتقازينوۆتىڭ ايتۋىنشا, وڭىردە ىندەتكە قارسى ينفەكتسيا­لىق اۋرۋحانالاردىڭ جۇكتەمەسى 37 پا­يىزدى, جانساقتاۋ بولىمدەرىندەگى ورىن­داردىڭ جۇكتەمەسى 18 پايىزدى قۇرايدى.

– قازىر 37 ناۋقاس جانساقتاۋ بو­لىمىندە, 14-ءى وكپەنى جاساندى جەل­دەتۋ اپپاراتىنا قوسىلعان. ناۋ­­قاس­تار ءوزىن-ءوزى ەمدەۋمەن ۋاقىت وتكى­زىپ العان. سوندىقتان تۇرعىندار دەن­­ساۋ­لىقتارىنا قاراپ, ۋاقتىلى ەمحاناعا كەلۋلەرى قاجەت, – دەدى ا.سەيىت­قازينوۆ.

سونىمەن قاتار وبلىستا كوروناۆيرۋس جۇقتىرعان 62 بالا باقىلاۋعا الىنسا, 23 بالا اۋرۋحانادا ەمدەلۋدە. قازىر اقتوعاي, ۋسپەن, جەلەزين, ماي, شارباقتى, اققۋلى اۋداندارى مەن اقسۋ, ەكىباستۇز قالالارى «قىزىل ايماقتا».

پاۆلودار وبلىسى