1,4 مىڭنان استام شەتەلدىك پتر انىقتاماسىز پاۆلودار وبلىسىنىڭ شەكاراسىنان وتپەك بولعان, دەپ حابارلايدى Egemen.kz قر دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋ كوميتەتىنىڭ ءباسپاسوز قىزمەتىنە سىلتەمە جاساپ.
پاۆلودار وبلىسىندا مەملەكەتتىك شەكاراداعى «قوساق», «ۇرلىتوبە», «سۇلۋ اعاش», «شارباقتى» وتكىزۋ بەكەتتەرىندە قوزعالىسقا مونيتورينگ جۇرگىزۋ جالعاسۋدا.
تەك 26 مامىردا پاۆلودار وبلىسىنىڭ شەكاراسى ارقىلى 335 ازامات ءوتتى. ولاردىڭ 148-ءى – جاياۋ جۇرگىنشىلەر, 187-ءى – جۇك كولىكتەرىنىڭ جۇرگىزۋشىلەرى. وسى كۇنى كارانتيندىك ستاتسيونارعا 9 ادام ورنالاستىرىلدى.
ءبىر تاۋلىك ىشىندە وتكىزۋ بەكەتتەرىندە Covid-19 راستالعان جاعدايلار انىقتالعان جوق.
رەسەي جانە قىرعىزستاننان كەلگەن 2 ازاماتتىڭ ەلگە كىرۋىنە تىيىم سالىندى. شەتەلدىكتەر پتر تەكسەرۋىنىڭ تەرىس ناتيجەسى بار انىقتامانى ۇسىنباعان.
شەكتەۋلەر ەنگىزىلگەن ساتتەن باستاپ (19.09.2020 ج.) پاۆلودار وبلىسىنا 108 943 ادام كەلدى. ولاردىڭ 65 296-ى – حالىقارالىق تاسىمالداردى جۇزەگە اسىراتىن جۇرگىزۋشىلەر بولسا, 43 647-ءى – جولاۋشىلار.
«26 مامىرداعى جاعداي بويىنشا 30 911 پتر تەكسەرۋ بارىسىندا اۋرۋدىڭ اسيمپتوماتيكالىق اعىمى بار 202 ادام انىقتالدى», دەلىنگەن حابارلامادا.
پتر تەكسەرۋدەن وتكىزۋ ءۇشىن 3 180 قازاقستاندىق كارانتيندىك ستاتسيونارلارعا جاتقىزىلدى.
1 446 شەتەلدىكتىڭ ەلگە كىرۋىنە (انىقتاماسىز) جول بەرىلگەن جوق.