اقتوبەدە ماس كۇيىندە كولىك ايداپ, رۋلگە يە بولا الماعان جۇرگىزۋشى جول اپاتىنا ۇشىرادى. جول-كولىك وقيعاسى كەزىندە جولاۋشى كوز جۇمدى, دەپ حابارلايدى Egemen.kz.
جول اپاتى حرومتاۋ اۋدانىنىڭ وڭعار كەنتى ماڭىندا تىركەلدى. رەسەي ەسەبىندە تۇرعان «ۆاز-2114» اۆتوكولىگىنىڭ 50 جاستاعى جۇرگىزۋشىسى رۋلگە يە بولا الماي, جولدىڭ سول جاق بولىگىنە اۋدارىلعان. جول-كولىك وقيعاسى سالدارىنان 40 جاستاعى جولاۋشى سول جەردە كوز جۇمدى. ال جۇرگىزۋشى مەن تاعى ەكى جولاۋشى ءتۇرلى جاراقاتپەن حرومتاۋ اۋدانىنىڭ ورتالىق اۋرۋحاناسىنا جاتقىزىلدى. بەلگىلى بولعانداي, بۇل ادامدار وزەن جاعاسىندا دەمالعان. جۇرگىزۋشى ماس كۇيىندە رۋلگە وتىرعان.
«اتالعان فاكتى قىلمىستىق كودەكستىڭ «كولىك قۇرالدارىن باسقاراتىن ادامداردىڭ جول ءجۇرىسى نەمەسە كولىك قۇرالدارىن پايدالانۋ قاعيدالارىن بۇزۋى» بابى بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە ەنگىزىلدى. بارلىق قاجەتتى ساراپتاما تاعايىندالدى. ماس كۇيىندە كولىك باسقارۋ — ەڭ اۋىر قىلمىس دەپ ەسەپتەيمىز. كوبىنەسە قايعىلى جاعدايمەن اياقتالادى», دەپ تولىقتىردى اقتوبە وبلىسى پد باستىعى اتىعاي ارىستانوۆ.