تۇركىستان وبلىسىندا تابىلعان ءۇش جىگىت وقيعانىڭ ءمان-جايىن ايتىپ بەردى, دەپ حابارلايدى Egemen.kz.
«ولاردىڭ جاعدايى جاقسى. مەديتسينالىق كومەك قاجەت ەمەس. ەكەۋى 1999 جىلعى, بىرەۋى 2000 جىلعى. ولار ءۇش كۇن بۇرىن ەكى توپقا بولىنگەنىن ايتادى», دەدى تجم رەسمي وكىلى تالعات ءۋالي.
ستۋدەنتتەر 21 مامىردا شىعىپ, ەكى كۇن جول جۇرگەننەن كەيىن قايتىپ كەلە جاتقان جولدا اداسىپ كەتكەن.
«كەيىن جەتى ادامنىڭ بىرەۋى اۋىرىپ قالدى, سول ءۇشىن ۇشەۋى ءبىر ورىندا قالدى دا تورتەۋى ارى قاراي كەتتى. سول جەردە ۇشەۋىمىز ءۇش كۇن تۇنەدىك. سوسىن بۇگىن شىعىپ كەلە جاتقان كەزدە تجم قىزمەتكەرلەرى ءبىزدى تاۋىپ الدى. بارشا اتسالىسقان ادامدارعا العىسىمىزدى ايتامىز», دەيدى جىگىتتەر.
ەسكە سالايىق, كەشە, 27 مامىردا نازارباەۆ ۋنيۆەرسيتەتىنىڭ ءباسپاسوز قىزمەتى تۇركىستان وبلىسى تاۋلارىندا جوعالىپ كەتكەن جەتى ساياحاتشىنىڭ التاۋى جوو ستۋدەنتتەرى ەكەنىن حابارلاعان بولاتىن.
21 مامىردا ۋنيۆەرسيتەتتىڭ التى ستۋدەنتى جانە كەنتاۋ قالاسى ليتسەي-ينتەرناتىنىڭ تۇلەگى تۇركىستان وبلىسىنداعى تاۋلارعا 4-5 كۇنگە جاياۋ ساياحاتقا شىعىپ كەتكەن. بۇگىن جوعالعان 7 جىگىتتىڭ ۇشەۋى تابىلدى.