پرەزيدەنتكە شىعىس قازاقستان وبلىسىنىڭ جىل باسىنان بەرگى الەۋمەتتىك-ەكونوميكالىق دامۋى جونىندە ەسەپ بەرىلدى, دەپ حابارلايدى Egemen.kz.
كەزدەسۋ بارىسىندا ءوڭىردىڭ ينفراقۇرىلىمدىق دامۋ ماسەلەلەرىنە ەرەكشە نازار اۋدارىلدى. وسى رەتتە, قاسىم-جومارت توقاەۆقا بۇقتىرما سۋ قويماسى ارقىلى وتەتىن كوپىردىڭ قۇرىلىسى بويىنشا بەرىلگەن تاپسىرمالارىنىڭ ورىندالۋى, سونداي-اق سەمەي قالاسىنداعى جۇك تاسيتىن كولىكتەرگە ارنالعان كوپىردىڭ قايتا جوندەلۋ بارىسى باياندالدى. ودان بولەك, دانيال احمەتوۆ پرەزيدەنتكە وسكەمەن جانە ءۇرجار قالالارىنداعى اۋەجايلاردى قايتا جوندەۋ جۇمىستارى تۋرالى اقپارات بەردى. اۋەجايلاردى جاڭعىرتۋ جۇمىستارى بيىل جىل سوڭىنا دەيىن اياقتالادى.
قاسىم-جومارت توقاەۆ حالىقتىڭ الەۋمەتتىك از قامتىلعان توبىنا ارنالعان تۇرعىن ۇيلەر مەن ينفراقۇرىلىمداردىڭ قۇرىلىسىن جىلدامداتۋ قاجەت ەكەنىن ايتتى. اكىمنىڭ ايتۋىنشا, 2020 جىلى جاعدايى تومەن جانە كوپبالالى انالارعا 1049 پاتەر مەن ءۇي بەرىلسە, ال وسى جىلدىڭ سوڭىنا دەيىن ولارعا قوسىمشا تاعى 1125 باسپانا بەرىلەدى.
كەزدەسۋدە كوتەرىلگەن تاعى ءبىر ماسەلە – اگرارلىق سەكتوردىڭ ەكسپورتتىق الەۋەتىن نىعايتۋ پەرسپەكتيۆالارى. دانيال احمەتوۆ مەملەكەت باسشىسىنا جىلىنا 300 مىڭ توننا ءونىم شىعاراتىن مايلى داقىلداردى قايتا وڭدەۋ زاۋىتىن ىسكە قوسۋ جانە اۋىل شارۋاشىلىعى ونىمدەرىنىڭ ءوندىرىسىن ودان ءارى كەڭەيتۋ جوسپارىن تانىستىردى.
ودان بولەك, ءوڭىردىڭ يندۋستريالدى-يننوۆاتسيالىق دامۋ ماسەلەلەرى ءسوز بولدى. دانيال احمەتوۆ اقتوعاي تاۋ-كەن بايىتۋ كومبيناتى قۇرىلىسىنىڭ ەكىنشى كەزەڭى تۋرالى مالىمەت بەردى.
پرەزيدەنت كەزدەسۋ قورىتىندىسى بويىنشا شىعىس قازاقستان وبلىسىنىڭ اكىمىنە بىرقاتار تاپسىرما بەردى.