الەمدەگى ەڭ ءىرى ەكونوميكالاردىڭ باسىم كوپشىلىگىندە كورپوراتيۆتى بانكروتتىق سانى وتكەن جىلى قىسقارىپتى. بۇل تۋرالى Dun & Bradstreet اقپاراتتىق كومپانياسى حابارلايدى, دەپ جازادى Egemen.kz.
مەملەكەتتىك قولداۋدىڭ اۋقىمدى شارالارى سالدارىنان كومپانيالاردىڭ كىرىستەرى مەن پايداسى, اسىرەسە شاعىن بيزنەستە وتكەن جىلى كۇرت تومەندەگەنىمەن, بانكروتتىقتىڭ الدىن الۋعا نەمەسە كەيىنگە قالدىرۋعا مۇمكىندىك بەردى.
بىرقاتار جاعدايلاردا, بورىشكەرلەرگە قاتىستى بانكروتتىق ءىسىن قوزعاۋ جاي ماعىناسىز بولىپ شىقتى, نەسيە بەرۋشىلەر تولەم قابىلەتسىز قوناقۇيلەرمەن, كرۋيزدىك كومپانيالارمەن, كينوتەاترلارمەن نەمەسە مەيرامحانالارمەن جۇمىس ىستەي المادى. ناتيجەسىندە فرانتسيادا كورپوراتيۆتىك بانكروتتىقتاردىڭ سانى جىل سوڭىندا 38,1%-عا تومەندەپ, 32 مىڭ 184-كە جەتتى, بۇل سوڭعى 30 جىلداعى ەڭ تومەنگى كورسەتكىش; جاپونيادا - 7,3%-عا, 7 مىڭ 773-كە دەيىن, 1989 جىلدان بەرگى تومەن دەڭگەي, ۇلىبريتانيادا - 26,8%. بىرقاتار سالالارعا بانكروتتىققا موراتوري كۇشىنە ەنگەن رەسەيدە سوتتار 2020 جىلى 9 931 كومپانيانى تولەم قابىلەتسىز دەپ تانىدى, بۇل 2019 جىلمەن سالىستىرعاندا 19,9%-عا از. وسى كەزەڭدەگى قۇلدىراۋ 14,7% قۇرادى. اتاپ ايتقاندا, اقش-تا ءۇش توقساننىڭ قورىتىندىسى بويىنشا بانكروتتىق 11,9%-عا, گەرمانيادا 13,1%-عا تومەندەدى.
تەك پورتۋگاليا, بولگاريا, پولشا, چەحيا, شۆەتسيا, گونكونگ جانە تايۆاندا وتكەن جىلمەن سالىستىرعاندا بانكروتتىقتىڭ ءوسۋى بايقالدى. ساراپشىلار 2021 جىلى قىزمەت كورسەتۋ سالاسىندا بانكروتتىق سانىنىڭ كوبەيەتىنىن ايتىپ وتىر.