رەسەيدىڭ بىرنەشە ايماعىندا ءۇي جانۋارلارىنا كوروناۆيرۋسقا قارسى ەكپە سالىنا باستادى, دەپ حابارلايدى Egemen.kz.
ۆاكتسينالاۋ ناۋقانى مال دارىگەرلىك ەمحانالاردا ءجۇرىپ جاتىر. بۇل تۋرالى وسى ەلدىڭ مالدارىگەرلىك جانە فيتوسانيتارلىق قاداعالاۋ جونىندەگى فەدەرالدىق قىزمەت وكىلدەرى مالىمدەدى.
رەسەي ناۋرىزدا يت, مىسىق, تۇلكى مەن قاراكۇزەنگە سىناق جاساپ, جانۋارلارعا ارنالعان الەمدەگى العاشقى ۆاكتسينانى تىركەگەن بولاتىن. جەرگىلىكتى عالىمدار جاساعان كوروناۆيرۋسقا قارسى بۇل پرەپارات «كارنيۆاك-كوۆ» دەپ اتالادى. 2 دوزاسى شامامەن 7 دوللارعا ساتىلادى. ەكپە سالىنعاننان كەيىن جانۋارلاردىڭ بويىنداعى يممۋنيتەت جارتى جىلعا دەيىن ساقتالادى ەكەن. «قازىر ءبىز بۇل ۆاكتسينانى ەۋرووداقتا تىركەتۋ ءۇشىن جۇمىس ىستەپ جاتىرمىز. بۇل ىسكە پولشا, گەرمانيا مەن ۆەنگريا وتە مۇددەلى بولىپ وتىر. سونداي-اق تايلاند, جاپونيا, مالايزيامەن دە كەلىسسوزدەر جۇرگىزىپ جاتىرمىز. ەرتەڭ ءبىزدىڭ ۆاكتسينانى پەرۋدە تىركەۋ جانە جەتكىزۋ مۇمكىندىگىن تالقىلاماقپىز», دەيدى «روسسەلحوزنادزور» باسشىسىنىڭ كەڭەسشىسى يۋليا مەلانو.