وبلىستىق دەنساۋلىق ساقتاۋ باسقارماسى ءباسپاسوز قىزمەتىنىڭ اقپاراتىنا قاراعاندا, 5 بالالى انا نۇرگۇل وڭعارباەۆا ينفەكتسيالىق ستاتسيونارعا جۇكتىلىكتىڭ 35-ءشى اپتاسىندا تۇسكەن ەكەن, دەپ حابارلايدى Egemen.kz.
«العاشقىدا السىرەۋ, قاتتى قالتىراۋ بايقالدى. كەيىن ءموبيلدى توپتى ۇيگە شاقىرىپ, كوروناۆيرۋستىق ينفەكتسياعا پتر سىناماسىن تاپسىردىم. ءۇش كۇن ۇيدە امبۋلاتورلىق ەم الدىم. ءتورتىنشى كۇنى تەمپەراتۋرا 38 گرادۋسقا دەيىن كوتەرىلگەن سوڭ جەدەل جاردەم شاقىرۋعا تۋرا كەلدى», دەيدى نۇرگۇل وڭعارباەۆا.
№2 وبلىستىق اۋرۋحاناداعى ينفەكتسيالىق ستاتسيوناردىڭ بوساندىرۋ زالىندا نۇرگۇل وڭعارباەۆانىڭ 6-ءسابيىن ومىرە اكەلدى. دارىگەرلەر اناسى مەن ءسابيىن امان ساقتاپ قالۋ ءۇشىن كەسىر تىلىگى ارقىلى وتا جاساعان.
«بۇرىن مەن دە, وزگە تۇرعىندار سەكىلدى اۋرۋدىڭ بار ەكەنىنە سەنبەدىم. باستاپقىدا وتتەگى تۇتىگىن كيگىم كەلمەپ ەدى. بىراق, جانساقتاۋ بولىمىنە تۇسكەندە امالسىزدان كيەسىڭ. مۇندا تاۋلىك بويى كەزەكشىلىك ەتىپ, ادامداردىڭ ومىرىنە اراشا بولىپ جۇرگەن دارىگەرلەردى, مەدبيكەلەردى كورىپ, باستاپقى ويىمنان اينىپ قالدىم. مەيىرىمدى دارىگەرلەردىڭ قۇرمەتىنە قىزىمىزدىڭ ەسىمىن مەيىرىم اتادىق», دەيدى نۇرگۇل وڭعارباەۆا.
ءباسپاسوز قىزمەتىنىڭ مالىمەتىنشە, ينفەكتسيالىق ستاتسيوناردا 51 ءسابي ومىرگە كەلگەن. قازىر ستاتسيوناردا 8 ايەل ەمدەلۋدە. ال, 43 جاس انا سابيىمەن بىرگە ۇيىنە شىعارىلعان. سابيلەردىڭ ەشقايسىسىنان كوروناۆيرۋستىق ينفەكتسيا انىقتالماعان.