بيىل باتىس قازاقستان وبلىسىنداعى جايىق وزەنى سۋىن قۋاڭشىلىق كەزىندە پايدالانۋ ءۇشىن قۋاتى تاۋلىگىنە 1,2 ملن تەكشە مەتردى قۇرايتىن سۋ سورۋ ستانساسىنىڭ قۇرىلىسى باستالادى. بۇل تۋرالى بۇگىن بقو اكىمى عالي ەسقاليەۆ ورتالىق كوممۋنيكاتسيالار قىزمەتىندە حالىق الدىندا ەسەپ بەرۋ بارىسىندا ايتتى, دەپ حابارلايدى Egemen.kz.
ونىڭ ايتۋىنشا, جايىق وزەنىنىڭ سول جاعالاۋىنداعى اۋدانداردىڭ 350 مىڭ گا دەيىن جايىلىم جەرلەرىن سۋلاندىرۋعا جانە شالقار كولىن قوسىمشا سۋمەن تولتىرۋعا مۇمكىندىك بەرەتىن ءۇش سۋ كانالىن رەكونسترۋكتسيالاۋ جۇمىستارى باستالادى.
«جايىق وزەنىنىڭ ماسەلەسىنە توقتالار بولساق, پرەزيدەنت تاپسىرماسى شەڭبەرىندە جايىق ترانسشەكارالىق وزەنى باسسەينىنىڭ ەكوجۇيەسىن ساقتاۋ جونىندەگى قازاقستان-رەسەي ىنتىماقتاستىعىنىڭ 2021-2024 جىلدارعا ارنالعان ارنايى باعدارلاماسى بەكىتىلدى. بۇل ماسەلە كۇردەلى, ءبىر جىل ىشىندە شەشىلەتىن ءىس ەمەس, تولىق شەشىمىن تابۋ ءۇشىن ەكى ەلدىن بىرلەسكەن ءىس-قيمىلى قاجەت. قازىرگى ۋاقىتتا عالىمدار مەن ساراپشىلار جايىق وزەنى باسسەينىنىڭ زەرتتەۋىن باستادى», دەدى ءوڭىر باسشىسى.