مەكتەپكە دەيىنگى ورتا ءبىلىم بەرۋ كوميتەتىنىڭ توراعاسى مايرا مەلدەبەكوۆا بيىلعى وقۋ جىلىندا نەشە وقۋشىنىڭ مەكتەپ بىتىرەتىنىن ايتتى, دەپ حابارلايدى Egemen.kz.
«جالپى 3 ملن 400 مىڭنان استام وقۋشىمىز بار. وسى وقۋ جىلىندا وقۋ پروتسەسى ءار ءتۇرلى فورماتتارمەن ءجۇردى. وقۋشى سانى 300 بالاعا دەيىنگى مەكتەپتەردىڭ ءبارى ءداستۇرلى فورماتتا وقىدى. ول مەكتەپتەردە 120 مىڭنان استام بالا بار. سونىمەن قاتار وقۋ جىلىنىڭ باسىنان بەرى 1-5 سىنىپتاردا كەزەكشى توپتار اشتىق. ارينە باستاۋىش سىنىپتاردىڭ بالالارىندا قاشىقتان وقۋعا داعدىلارى قالىپتاسپاعاندىقتان ولاردىڭ بارىمەن ەلدەگى سانيتارلىق احۋالعا بايلانىستى كەزەكشى توپتار بويىنشا جۇمىس ىستەۋگە قۇزىرلى مينيسترلىكتەن رۇقسات الىپ وتىردىق», دەدى مايرا مەلدەبەكوۆا.
مينيسترلىك وكىلى ءىىى توقساننان باستاپ 9-11 سىنىپتاردا قورىتىندى اتتەستاتسيا ەمتيحاندارىن تاپسىراتىن بولعاندىقتان, ءداستۇرلى فورماتتا ءبىلىم الۋعا مۇمكىندىك العانىن ەسكە سالدى.
«جىل بويىندا وقىتۋ فورماتى ءاربىر ەلدى مەكەننىڭ سانيتارلىق-ەپيدەميولوگيالىق جاعدايىنا بايلانىستى تاڭدالىپ وتىردى. قورىتىندى اتتەستاتتاۋعا باراتىن 264 800-دەن استام بالا 9 سىنىپ تۇلەگى, 154 400-دەن استام 11 سىنىپ تۇلەگى بار», دەدى كوميتەت باسشىسى مايرا مەلدەبەكوۆا.