بالالىق شاق ءۇشىن قاۋىپسىز ەلدەر رەيتينگىندە قازاقستان 180 ەلدىڭ ىشىندە 50-ورىنعا يە بولدى. ەلدىڭ يندەكسى 1000-نان 933-ءتى قۇرادى. يندەكس 1000-عا جاقىن بولعان سايىن بالالاردى قورعاۋ دەڭگەيى سوعۇرلىم جوعارى ەكەنىن بىلدىرەدى, دەپ حابارلادى Egemen.kz finprom.kz سايتىنا سىلتەمە جاساپ.
تمد ەلدەرىنىڭ ىشىندە قازاقستاندى بەلارۋس پەن رەسەي باسىپ وزدى. ارمەنيا, وزبەكستان, تۇركمەنستان جانە قىرعىزستان قازاقستاننان ارتتا قالدى. بالالار ءۇشىن ەڭ قولايلى ەلدەر سينگاپۋر, سلوۆەنيا بولدى, ال ءۇشىنشى ورىندا فينليانديا مەن شۆەتسيا تۇر.
ال ەڭ قولايسىز ەلدەر – نيگەريا, ورتالىق افريكا رەسپۋبليكاسى جانە چاد. يندەكس دەنساۋلىق ساقتاۋ, ءبىلىم بەرۋ جانە جالپى بالالار قاۋىپسىزدىگى كورسەتكىشتەرىن ەسكەرگەن.
ايتا كەتسەك, قازاقستاندا وسى جىلدىڭ باسىندا 0-15 جاس ارالىعىنداعى 5,8 ملن بالا تىركەلدى, بۇل وتكەن جىلمەن سالىستىرعاندا 2,7% ارتىق. بالالار مەن جاسوسپىرىمدەردىڭ كوپ بولىگى تۇركىستان وبلىسىندا تۇرادى: 815,4 مىڭ ادام.
بالالاردىڭ سانى بويىنشا توپ-3 ايماققا الماتى وبلىسى مەن الماتى قالاسى كىرەدى. بالالاردىڭ ەڭ از بولىگى سولتۇستىك قازاقستان وبلىسىندا تۇرادى.