ا. مامين ريددەر قالاسىنىڭ ورتتەن زارداپ شەككەن تۇرعىندارىمەن كەزدەستى

ۇكىمەت باسشىسى بيىل 10 مامىردا ءورت سالدارىنان زارداپ شەككەن قالا تۇرعىندارىمەن كەزدەسۋ وتكىزىپ, ولارعا ارنالعان تۇرعىن ءۇي قۇرىلىسى جۇمىستارىنىڭ بارىسىن تەكسەردى.

«مەملەكەت باسشىسى قاسىم-جومارت توقاەۆتىڭ تاپسىرماسى بويىنشا ريددەر قالاسىندا بولعان ورتتەن زارداپ شەككەن بارلىق وتباسىلار جاقىن ارادا جاڭا تۇرعىن ۇيمەن قامتاماسىز ەتىلەدى. ۇكىمەت پەن شىعىس قازاقستان وبلىسىنىڭ اكىمدىگى مەملەكەت باسشىسىنىڭ تاپسىرمالارىن جۇزەگە اسىرۋ ءۇشىن بارلىق قاجەتتى شارالاردى قابىلدادى», دەدى ا. مامين.

ورتتەن زارداپ شەككەن وتباسىلارعا ارنالعان 30 جاڭا تۇرعىن ءۇيدىڭ قۇرىلىسى توتەنشە جاعدايلار سالدارىن جويۋ ءۇشىن قاراستىرىلعان ۇكىمەت رەزەرۆىنىڭ قاراجاتى ەسەبىنەن جاڭا «بوتانيكا ءۇشىنشى تۇرعىن ءۇي اۋدانىندا» جۇرگىزىلۋدە. ءار ۇيدىڭ اۋدانى – 80 شارشى مەتر, ال ءۇي ماڭىنداعى جەكە ۋچاسكە كولەمى – 10 سوتىق.

ريددەر قالاسىندا بولعان ءورت سالدارىن جويۋ ءۇشىن 557,5 ملن تەڭگە ءبولىندى. قۇرىلىس جۇمىستارىن «وبلشىعىسجول», «VK Invest Company», «QK Sunqar», «ۆوستوكۆزرىۆپروم», «KazprofstroyHolding» كومپانيالارى جۇرگىزۋدە.

ۇيلەردىڭ قۇرىلىسىن بيىلعى 15 تامىزعا قاراي اياقتاۋ جوسپارلانعان. جاڭا شاعىن اۋداندا بارلىققاجەتتى ينجەنەرلىك-كوممۋنيكاتسيالىق ينفراقۇرىلىم سالىنادى.

جۇمىس ساپارىنا شىعىس قازاقستان وبلىسىنىڭ اكىمى دانيال احمەتوۆ, يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ, قارجى ءمينيسترى ەرۇلان جاماۋباەۆ, توتەنشە جاعدايلار ءمينيسترى يۋري يلين قاتىستى.