يوردانيا استاناسى – امماندا ءوتىپ جاتقان تاەكۆوندودان وليمپيا ويىندارىنا جولداما بەرەتىن ازيا قۇرلىعىنداعى ىرىكتەۋ جارىسىندا ەكى جەرلەسىمىز فينالعا شىعىپ, ەل قورجىنىنا كەزەكتى وليمپيادا جولداماسىن سالدى.
اممانداعى جارىستىڭ ەكىنشى كۇنىندە قىزدار اراسىندا 67 كيلودان جوعارى سالماقتا قازاقستان قۇراماسىنان سىنعا تۇسكەن جانسەل دەنيز جارتىلاي فينالدا تاجىكستاندىق موحرۋ حاليموۆانى 12:2 ەسەبىمەن جەڭىپ فينالعا شىقسا, ەرلەر اراسىندا باق سىناعان رۋسلان جاپاروۆ (+80 كگ) تا قارسىلاستارىن قوعاداي جاپىرىپ, فينالعا جولداما الدى. ول جارتىلاي فينالدا حالىقارالىق تاەكۆوندو فەدەراتسياسىنىڭ اتىنان شىققان يراندىق سپورتشى اميري الي اكباردى 31:20 ەسەبىمەن ۇتتى.
ىرىكتەۋ جارىسىنىڭ ەرەجەسى بويىنشا, فينالعا شىققان ەكى سپورتشىعا اۆتوماتتى تۇردە وليمپيادا ليتسەنزياسى بەرىلەدى. ءسويتىپ, 2016 جىلى برازيليادا وتكەن وليمپيا ويىندارىندا دا ونەر كورسەتكەن رۋسلان مەن جانسەل وزدەرىنىڭ ەكىنشى وليمپياداسىنا قاتىسۋعا مۇمكىندىك الدى.
قازىرشە قازاقستان قۇراماسى جاپونيادا جالاۋى جەلبىرەيتىن جازعى وليمپيا ويىندارىنا جالپى سانى 55 جولداما جەڭىپ الدى.