ۇزدىكتەر ۇپايدان شاشاۋ شىعارعان جوق

تۋردىڭ العاشقى ويىنى تۇركىستاندا جەرگىلىكتى «تۇ­ران» مەن ورالدىڭ «اق­جايىق» كلۋبتارى اراسىندا ءوتتى. ەل چەمپيوناتىنا بيىل تۇڭعىش رەت قاتىسىپ جاتقانىنا قاراماستان, سوڭعى ءۇش ويىندا «ورداباسى», «شاحتەر», «قىزىلجار» سەكىلدى تاجىريبەلى كلۋبتاردى جەڭىپ, فۋتبول ماماندارى مەن جانكۇيەرلەر نازارىن وزدەرىنە اۋدارعان «تۇران» فۋتبولشىلارىنىڭ شاماسى بۇل جولى «اقجايىققا» جەتپەدى. تۇركىستان وبلى­سىنىڭ ۇجىمى قاتارىنان ءۇش جەڭىستىڭ ەيفورياسىنان شىعا المادى ما, ايتەۋىر ءوز الاڭىندا «اقجايىقتان» 2:1 ەسەبىمەن جەڭىلىپ قالدى. وتكەن تۋردا بىلتىرعى ەل چەم­پيونى «قايراتتان» ءۇش ۇپاي العان «اقجايىق» جە­ڭىس­تەر سەرياسىن ءتورت ويىن­عا جەتكىزىپ, تۋرنير كەس­تە­سىندەگى 3-ورنىن ساقتاپ قالدى.

ال ورالدان ابىرويسىز ورالىپ, جانكۇيەرلەردىڭ سىنىنا ۇشىراعان «قايرات» وسى تۋردا «اقتوبەنى» قابىل­دادى. سىننان وڭ قورىتىندى شىعارىپ, وسى ماۋسىمدا العاش رەت جانكۇيەرلەرىنىڭ قولداۋىمەن ويىن وتكىزگەن الەكسەي شپيلەۆسكيدىڭ شا­كىرتتەرى 4:2 ەسەبىمەن جەڭىسكە جەتتى. چەمپيوناتتىڭ ال­عاش­قى بەس تۋرىن ءساتتى باستاعان «اقتوبە» وسىمەن بەسىنشى ويىندا قارسىلاستارىنان جەڭىلدى.

ءار تۋر سايىن چەم­پيون­دىققا قاراي جاقىنداپ كەلە جاتقان ەلوردانىڭ «استانا» كلۋبى بۇل جولى قارسىلاسىنان باسىم ءتۇسىپ, تۋرنير كەستەسىندە وزىنەن كەيىنگى ورىنداردا تۇرعان كلۋبتاردان ۇزاپ بارا جاتىر. سىرت الاڭدا قىزىلوردانىڭ «قايسارىمەن» كەزدەس­كەن ەلوردالىق ۇجىم 5:2 ەسە­بىمەن جەڭىسكە جەتتى. 12-تۋردان بەرى بىردە-ءبىر ويىندا جەڭىلمەگەن «استانا» كە­لەسى تۋردا ءوز الاڭىندا «قاي­راتتى» قابىلدايدى. ەگەر ەلوردالىقتار بۇل ماتچتا دا قاجەتتى ءۇش ۇپايىنا قول جەتكىزەتىن بولسا, وندا قالعان كوماندالارعا «استانانى» تۇساپ ۇستاۋ قيىن بولاتىن سياقتى.

8-تۋرعا دەيىن «استا­نانىڭ» سوڭىنا ەرىپ, تۋرنير كەستەسىندە ەكىنشى ورىنعا دەيىن كوتەرىلگەن «تاراز» قاتارىنان ءتورتىنشى ويىندا ۇپاي جوعالتتى. وتكەن تۋرلاردا «استانا», «توبىل» سەكىلدى ۇزدىك كلۋبتارعا جول بەرگەن جامبىلدىقتار بۇل تۋردا كوش سوڭىندا كەلە جاتقان «جەتىسۋ» كلۋبىن جەڭە المادى. تارازداعى ورتا­لىق ستاديوندا وتكەن ويىن 3:2 ەسەبىمەن قوناق­تار­دىڭ پايداسىنا اياقتالدى. 9 تۋردان بەرى جەڭىسكە جەتىپ كورمەگەن رينات اليۋەتوۆ شاكىرتتەرى وسىلايشا ماۋ­سىم­داعى ەكىنشى جەڭىسىن تويلادى.

وتكەن تۋردا «قىزىل­جاردان» جەڭىلگەن «كاسپي» بۇل جولى «شاحتەردەن» ۇپاي الدى. «جاس قانات» ستاديونىندا وتكەن ماتچتا الاڭ يەلەرى بار ماسەلەنى العاشقى تايمدا شەشىپ تاس­تادى. ماتچتىڭ 2-مينۋتىندا «كاسپي» شابۋىلشىسى داۆيد كاراەۆ ەسەپتى اشسا, 9-مينۋتتا ۋادجدي سالي تاب­لوداعى كورسەتكىشتى ەسەلەدى. ال 30-مينۋتتا كاراەۆ ءدۋبلدىڭ اۆتورى اتاندى. ايىپ دوبىنان كەرەمەت گول سوققان ول وسىلايشا ماتچتىڭ نۇكتەسىن قويدى. سەنىمدى تۇردە جەڭىسكە جەتكەن الاڭ يەلەرى 16 ۇپايمەن 8-ورىنعا كوتەرىلدى. قاراعاندىلىق ۇجىم 8 ۇپايمەن 12-ورىنعا تابان تىرەدى.

سوڭعى ءتورت ويىننىڭ ەكەۋىندە جەڭىلىپ, ەكى ماتچ­­­تا تەڭ تۇسكەن «ورداباسى» كلۋ­بى بۇل تۋردا دا ۇپاي بولى­سۋگە ءماجبۇر بولدى. اتىراۋعا قوناققا بار­عان شىمكەنتتىك ۇجىم «مۇ­نايشى» ستاديونىندا وتكەن ويىندا  «اتىراۋ» كلۋبىمەن 0:0 ەسەبىمەن تەڭ وينا­دى. كەزدەسۋدىڭ 61-مينۋ­تىندا «ورداباسى» كلۋبى­نىڭ قورعاۋشىسى الە­ك­ساندر سيمچەۆيچ ءوز ايىپ الاڭىنان ءتارتىپ بۇزعان­دىقتان, تورەشى پەنالتي بەلگىلەدى. 11 مەترلىك ايىپ دوبىن ورىنداعان «اتى­راۋ» كلۋبىنىڭ جارتىلاي قورعاۋشىسى دونەت شكود­را بۇل مۇمكىندىكتى گولعا اينالدىرا المادى. ءبىر ۇپاي­دى قاناعات ەتكەن ەكى كوماندا دا تۋرنير كەستەسىندەگى ءوز ورىندارىن ساقتاپ قالدى.

12-تۋرعا جوسپارلانعان سوڭعى ماتچتا «توبىل» ءوز الاڭىندا پەتروپاۆلدىڭ «قىزىلجار» كلۋبىن 2:0 ەسەبىمەن ايقىن باسىم­دىقپەن جەڭىپ, تۋرنير كەس­تە­سىندەگى ەكىنشى ورنىن ساق­تاپ قالدى. قوستانايلىق كلۋب ساپىنان 64-مينۋتتا نە­مانيا نيكوليچ پەن 77-مينۋتتا سەرىكجان مۇجىقوۆ مەرگەندىگىمەن كوزگە ءتۇستى.

ءسوز باسىندا ايتقان­داي, وزگە تۋرلارمەن سالىس­تىر­عاندا بۇل تۋردىڭ ويىندارى گولعا باي بولدى. جەتى ماتچتىڭ تەك ءبىر كەزدەسۋىندە عانا ەسەپ اشىلمادى. قال­عان التى ويىندا جالپى – 25 گول سوعىلدى. بيىلعى ماۋسىمداعى گول سوعۋ بو­يىنشا رەكورد ازىرشە 4-تۋرعا تيەسىلى – 32 گول.

23-24 مامىردا وتەتىن 13-تۋردا «اقتوبە» – «تۇران», «استانا» – «قايرات», «جەتىسۋ» – «قايسار» (ويىندار جەكسەنبى كۇنى وتەدى), «ورداباسى» – «تاراز», «قىزىلجار» – «اتىراۋ», «شاحتەر» – «توبىل» جانە «اقجايىق» – «كاسپي» (ويىندار دۇيسەنبى كۇنى وتەدى) كلۋبتارى كەزدەسەدى.