لاتۆيا استاناسى – ريگادا جالاۋى جەلبىرەگەن شايبالى حوككەيدەن الەم چەمپيوناتى قازاقستان قۇراماسى ءۇشىن ءساتتى باستالدى. توپتىق كەزەڭدەگى العاشقى تۋر ويىنىن جارىس قوجايىندارىمەن وتكىزگەن جەرلەستەرىمىز بۋلليت سەرياسىندا جەڭىسكە جەتتى.
جالپى بيىلعى جاھاندىق دودانىڭ العاشقى كۇنىنەن باستاپ ماتچتار وتە تارتىستى ءارى توسىن ناتيجەلەرمەن باستالدى. ماسەلەن, ۆ توبىنداعى العاشقى تۋردا لاتۆيا حوككەيشىلەرى الەم چەمپيوناتىندا 26 مارتە توپ جارىپ, وليمپيا ويىندارىندا 9 رەت ۇزدىك شىققان ۇيەڭكى جاپىراقتار ەلىنىڭ قۇراماسىن 2:0 ەسەبىمەن جەڭىپ, بىرىنشىلىكتىڭ العاشقى سەنساتسياسىن جاسادى. ال اراعا ءبىر كۇن سالىپ قازاقستان قۇراماسىمەن جولىققان مۇزايدىن يەلەرى تەڭ دارەجەدە وتكەن تارتىستى باسەكەدە ەسە جىبەردى.
اراعا بەس جىل سالىپ شايبالى حوككەيدەن ەليتالى الەم چەمپيوناتىنا ورالعان يۋري ميحايليس شاكىرتتەرى وسىلايشا ءتۋرنيردى كوتەرىڭكى كوڭىل كۇيمەن باستادى. لاتۆيامەن وتكەن ويىننىڭ العاشقى كەزەڭىنەن كەيىن كوماندالار ۇزىلىسكە تەڭ ەسەپپەن شىقتى. العاشقى 20 مينۋتتا ەكى قۇرامانىڭ ويىنشىلارىندا دا گول سوعاتىن تاماشا مۇمكىندىكتەر بولعانىمەن, قاقپاشىلار قىراعىلىق تانىتىپ, قاقپالارىنا بىردە-ءبىر شايبا وتكىزگەن جوق.
قازاقستاندىق حوككەيشىلەرگە قاراعاندا ءبىر كۇن بۇرىن مۇزايدىنعا شىعىپ, ويىن تاجىريبەسىنە يە بولعان مۇزايدىن يەلەرى ءبىرىنشى بولىپ كەزدەسۋدىڭ ەسەبىن اشتى. ماتچتىڭ 27-مينۋتىندا لاتۆيا قۇراماسىنان لاۋريس دارزينش مەرگەندىگىمەن كوزگە ءتۇسىپ, 2018 جىلدان كەيىن ۇلتتىق قۇراماعا ورالعان قاقپاشىمىز نيكيتا بوياركيندى قاپى قالدىردى. قازىرگى تاڭدا بوياركين قاراعاندىنىڭ «تەمىرتاۋ» كلۋبىنىڭ قاقپاسىن قورعايدى.
گول سوققاننان كەيىن قارقىنىن ۇدەتە تۇسكەن لاتۆيا ويىنشىلارى ەسەپتى ەسەلەۋگە تىرىسىپ, كوماندا بولىپ العا قاراي ۇمتىلعان ەدى. بىراق قورعانىستى ۇمىت قالدىرعان جارىس قوجايىندارى قازاقستان قۇراماسىنىڭ ويىنشىسىنا قارسى ءتارتىپ بۇزىپ, قورعاۋشى ۋۆيس يانيس بالينسكيس تورەشى تاراپىنان ەكى مينۋت ايىپ جازاسىنا تارتىلدى. وسىلايشا سان باسىمدىعىنا يە بولىپ, ەسەپتى تەڭەستىرەتىن تاماشا مۇمكىندىككە يە بولعان جەرلەستەرىمىز ۇرىمتال ءساتتى ءمۇلت جىبەرمەدى. كوماندا كاپيتانى رومان ستارچەنكو مەن ونىڭ اسسيستەنتى داررەن ديتستەن تاماشا پاس العان الەكساندر شين قاقپانى ءدال كوزدەدى. ءسويتىپ ول قازاقستان قۇراماسىنىڭ بيىلعى الەم چەمپيوناتىندا سوعىلعان العاشقى شايباسىنىڭ اۆتورى اتاندى.
ءۇشىنشى كەزەڭدە قارقىندارىن باسەڭدەتپەگەن ەكى قۇراما ويىنشىلارى تاعى دا ءبىر شايبامەن الماستى. 45-مينۋتتا ريحاردس بۋكارتس كومانداسىن ەسەپتە قايتا العا شىعارسا, اراعا 12 سەكۋند سالىپ دجەسسي بلەكەر ەسەپتى تەڭەستىرىپ كەتتى. ماتچ سوڭىنا دەيىن تابلوداعى ەسەپ وزگەرىسسىز قالىپ, ويىن وۆەرتايمعا ۇلاستى. الايدا قوسىمشا ۋاقىتتا دا حوككەيشىلەر ءبىر-ءبىرىنىڭ قاقپا كىلتىن تابا المادى.
بۇل كەزدەسۋدە جەڭىمپاز كوماندانىڭ ەسىمى ويىن سوڭىنداعى بۋلليت سەرياسىندا (حوككەيدەگى پەنالتي) انىقتالدى. شەشۋشى ساتتە لاتۆيا قۇراماسىنا قاراعاندا دالدىك تانىتقان جەرلەستەرىمىز 4:3 ەسەبىمەن مۇزايدىن يەلەرىنەن جەڭىستى ج ۇلىپ الدى. بۋلليت سەرياسىندا الەكساندر شين, نيكيتا ميحايليس, رومان ستارچەنكو جانە ەۆگەني رىمارەۆ قاقپانى ءدال كوزدەپ, جانكۇيەرلەرگە جەڭىس سىيلادى.
ويىننان كەيىن قازاقستان قۇراما كومانداسىنىڭ باس باپكەرى يۋري ميحايليس سۇحبات بەرىپ, بارشا قازاقستاندىق حوككەي جانكۇيەرلەرىنە قۋانىش سىيلاعان شاكىرتتەرىنە ريزاشىلىعىن ءبىلدىردى.
– وتە تارتىستى ويىن بولدى. ءبىز ءاۋ باستا-اق لاتۆيا قۇراماسىنىڭ قالاي وينايتىنىن بىلدىك جانە وسى ويىنعا دايىن بولدىق. جىگىتتەر بۇگىنگى ويىندا حوككەيشىگە ءتان مىنەز, تاباندىلىق كورسەتتى. العاشقى مينۋتتاردان باستاپ بەلسەندى ويناپ, قارسىلاستى بارىنشا ساستىرۋعا تىرىستىق. مەنىڭ ويىمشا, جوسپارىمىز ىسكە استى, دەگەنمەن كەي ساتتەردە قارسىلاستارىمىزدىڭ ەركىن قيمىلداۋىنا دا مۇمكىندىك بەرىپ قويدىق. جالپى جىگىتتەردىڭ بۇگىنگى ويىنىنا كوڭىلىم تولدى, بارىنە ريزامىن, ولار بۇگىن كەرەمەت ويىن ورنەگىن كورسەتتى. ءبىزدىڭ حوككەيشىلەر – وتان ءۇشىن, قازاقستان ءۇشىن كۇرەسكەن ناعىز ەرلەر, – دەدى باس باپكەر.
العاشقى ەكى كۇننىڭ ناتيجەسى بويىنشا, 2 ۇپايعا قول جەتكىزگەن قازاقستان قۇراماسى ۆ توبىندا 4-ورىنعا تۇراقتادى. العاشقى تۋردا يتاليا قۇراماسىنان 9:4, ەكىنشى تۋردا نورۆەگيا قۇراماسىنان 5:1 ەسەبىمەن ايلاسىن اسىرعان گەرمانيالىق حوككەيشىلەر 6 ۇپايمەن كوش باستاپ تۇر. ال كانادانى 2:0 ەسەبىمەن جەڭىپ, قازاقستاننان ۇتىلعان لاتۆيا 4 ۇپايمەن 2-ورىندا. ءبىرىنشى تۋردا اقش-تان باسىم تۇسكەن فينليانديا بولسا 3 ۇپايمەن 3-ورىندا كەلەدى. ال بىردە-ءبىر ۇپاي الماعان اقش, كانادا, نورۆەگيا جانە يتاليا حوككەيشىلەرى 5-8 ورىنداردى ءوزارا ءبولىسىپ تۇر. بۇل – ۆ توبىنداعى جاعداي.
ا توبىنداعى باسەكەلەر دە تارتىستى وتۋدە. ەڭ كەيىنگى رەت 2012 جىلعى الەم چەمپيوناتىندا دارا شىققان رەسەي حوككەيشىلەرى العاشقى تۋردا چەحيا قۇراماسىنان باسىم ءتۇستى. جەتى شايبا سوعىلعان كەزدەسۋدە سولتۇستىكتەگى كورشىلەرىمىز سوڭعى ساتتە جەڭىستى ج ۇلىپ الدى. ماتچتىڭ اياقتالۋىنا 19 سەكۋند قالعاندا ميحايل گريگورەنكو گول سوعىپ, رەسەي قۇراماسىنا ماڭىزدى ءۇش ۇپايدى سىيلادى. ال ەكىنشى تۋردا ۇلىبريتانيا حوككەيشىلەرىن 7:1 ەسەبىمەن ۇتقان رەسەي 6 ۇپايمەن تۋرنير كەستەسىندە جەكە-دارا كوش باستادى.
كەيىنگى ورىندارعا ءبىرىنشى تۋردا قارسىلاستارىنان باسىم تۇسكەن سلوۆاكيا, شۆەيتساريا جانە دانيا قۇرامالارى جايعاسقان. اتاپ ايتار بولساق, العاشقى تۋردا سلوۆاكيا بەلارۋس قۇراماسىنان 5:2 ناتيجەسىمەن باسىم تۇسسە, شۆەيتساريا ءدال وسىنداي ەسەپپەن چەحيا حوككەيشىلەرىن جەڭدى. ال دانيا الەم چەمپيوناتتارىندا العاش رەت شۆەتسيادان ايلاسىن اسىردى. ەسەپ – 4:3.
كەشە كەشكىسىن فينليانديامەن ويناعان قازاقستان قۇراماسى كەيىنگى تۋرلاردا – اقش (25 مامىر), گەرمانيا (26 مامىر), كانادا (28 مامىر), يتاليا (29 مامىر) جانە نورۆەگيا (31 مامىر) حوككەيشىلەرىمەن كەزدەسەدى.