قىزىلوردادا سۋ تاپشىلىعىنىڭ الدىن الۋ ماسەلەسى تالقىلاندى

- بۇگىندە سىرداريا وزەنىنىڭ اعىسىن رەتتەيتىن نارىن-سىرداريا سۋ قويمالارىنداعى سۋ كولەمى وتكەن جىلدان 2 ملرد تەكشە مەترگە كەم. قازىرگى تاڭدا شاردارا سۋ قويماسىنا ءتۇسىپ جاتقان سۋدىڭ كولەمى ەگىنشىلەرىمىزدى الاڭداتىپ وتىر. 2021 جىلى وبلىس بويىنشا 188,2 مىڭ گەكتارعا اۋىل شارۋاشىلىعى داقىلدارىن ورنالاستىرۋ جوسپارلانسا, ونىڭ ىشىندە كۇرىش ەگىسىنىڭ كولەمى وتكەن جىلدان 5,1 مىڭ گەكتارعا قىسقارتىلىپ, 84,4 مىڭ گەكتارعا ەگۋ مەجەلەندى. دەگەنمەن, كۇرىش ەگۋ جانە ونى سۋعا باستىرۋ جاعدايى اسا كۇردەلى بولىپ وتىر. اتاپ ايتقاندا, وتكەن جىلدىڭ وسى كەزەڭىمەن سالىستىرعاندا كۇرىش ەگۋ 5,1 مىڭ گەكتارعا جانە سۋعا باستىرۋ 7,4 مىڭ گەكتارعا كەم كەلە جاتىر. سۋ تاپشىلىعى جاعدايىنىڭ الدىن الۋ ءۇشىن, سۋ رەسۋرستارى كوميتەتى مەن قىزىلوردا وبلىسى اكىمدىگىنىڭ ۆەگەتاتسيالىق كەزەڭدە سۋ تاپشىلىعىنىڭ الدىن الۋ بويىنشا اتقارىلاتىن بىرلەسكەن ءىس شارالار جوسپارىن بەكىتتىك. سونىمەن بىرگە, كانالدار ارقىلى سۋ الۋ رەجيمدەرىنىڭ كەستەگە ساي ورىندالۋىنا مونيتورينگ جۇرگىزەتىن جۇمىسشى توبى قۇرىلىپ, جۇمىس جۇرگىزىلۋدە, - دەدى وبلىس اكىمى گۇلشارا ابدىقالىقوۆا.

ال, ۆيتسە-مينيستر سەرىك قوجانيازوۆ سىرداريا سۋىن مولايتۋ ماقساتىندا حالىقارالىق كەلىسىم-شارتتاردىڭ جاسالىپ جاتقانىن جەتكىزدى. ماسەلەن, وزەندەگى سۋدىڭ از بولۋىنا بايلانىستى قىرعىزستانعا وزبەكستانمەن بىرلەسىپ تاۋار الماسۋ رەتىندە الدىن الا ەلەكتر ەنەرگياسىن جونەلتىلۋدە. مامىر ايىنىڭ سوڭىنا دەيىن ەلىمىز قىرعىزستانعا 370 ملن كۆ ساعات, ال وزبەكستان 250 ملن كۆ ساعات ەلەكتر ەنەرگيسىن بەرۋدى جوسپارلاپ وتىر. ەلەكتر قۋاتىن قىرعىز ەلى تامىز ايىندا قايتارىپ, وعان قوسا جاز ايلارىنداعى سۋ اسا قاجەت كەزەڭدە 370 ملن تەكشە مەتر سۋ جىبەرەدى.

- سىرداريا وزەنى «توقتاعۇل» سۋ قويماسىندا جينالعان سۋ كولەمىنە تىكەلەي تاۋەلدى. اتالعان قويمادا جىلىنا 15 ملرد. تەكشە مەتر سۋ جينالۋ كەرەك بولسا, بيىلعى جىلى وندا سۋدىڭ كولەمى 7-8 ملرد.-قانا. سول سەبەپتى, قازىرگى تاڭدا وزبەكستان, تاجىكستان, قىرعىزستان مەملەكەتتەرى دە سۋ تاپشىلىعىنان قينالۋدا. قىرعىستاندا سۋارمالى جەرلەر از, الايدا ولار ەلەكتر ەنەرگياسىن وندىرەدى. بيىلعى سۋ تاپشىلىعى ولاردىڭ ەلەكتر ەنەرگياسىن جەتكىلىكتى دەڭگەيدە وندىرۋىنە مۇمكىندىك بەرمەۋدە. سوندىقتان ولارمەن ايىرباس نەگىزىندە  سۋ الۋدى كوزدەپ وتىرمىز, - دەدى ەكولوگيا, گەولوگيا جانە تابيعي رەسۋرستار ۆيتسە-ءمينيسترى سەرىك قوجانيازوۆ.

سونداي-اق, قازاقستان مەن وزبەكستان تاراپى تاجىكستان شەكاراسىندا ورنالاسقان «قايراق قۇم» سۋ قويماسىنىڭ جوندەۋ جۇمىستارىنا دا قول ۇشىن سوزباق.  

جيىندا ارال-سىرداريا باسسەيىندىك ينسپەكتسياسىنىڭ باسشىسى سەيىلبەك نۇرىمبەتوۆ پەن «قازسۋشار» رەسپۋبليكالىق مەملەكەتتىك كاسىپورنى قىزىلوردا فيليالىنىڭ ديرەكتورى حاميت بيىمبەتوۆ سۋ تاپشىلىعىنا بايلانىستى اعىمداعى جىلى قىزىلوردا قالاسى جانە ءاربىر اۋدان بويىنشا ەگىلەتىن كۇرىش داقىلىنىڭ روتاتسياسىن ساقتاۋدى باقىلاۋعا العاندارىن ايتادى. اۋدان اكىمدەرىمەن, شارۋاشىلىق قۇرىلىمدارىمەن كەلىسە وتىرىپ, ماگيسترالدى جانە شارۋاشىلىقارالىق كانالداردى كەزەكتەستىرىپ سۋ بەرۋ كەستەسىن ازىرلەگەن. شارۋاشىلىق قۇرىلىمدارى ىشكى كانالدار مەن قاشىرتقى جۇيەلەرىن تازارتۋىنا باقىلاۋ جاساپ, سۋ بەرۋ ماۋسىمى كەزەڭىندە سۋدى ۇنەمدى پايدالانۋ ماقساتىندا قاشىرتقىلارعا ارتىق سۋ اعىزباۋدى قاداعالاۋ جۇرگىزىپ كەلەدى. ەلدى مەكەندەردى اياق سۋمەن قامتاماسىز ەتۋ ماقساتىندا  45 شاقىرىم بولاتىن 8 كانالعا سۋ شارۋاشىلىعى جۇمىستارىن جۇرگىزۋگە وبلىستىق بيۋدجەتتەن قارجى ءبولىنىپ جۇمىستار اتقارىلۋدا. سونىمەن بىرگە, وبلىستىق بيۋدجەتتەن ەلدى مەكەندەرگە 43 دانا ناسوس قوندىرعىلارى ساتىپ الۋ بەلگىلەنىپ, سونىڭ بۇگىنگى كۇنگە 8-ءى جەتكىزىلگەن.

سەلەكتورلىق ماجىلىستە وبلىستىق اۋىلشارۋاشىلىعى باسقارماسى باسشىسىنىڭ ورىنباسارى اينۇر تىلەۋلەەۆا سۋ تاپشىلىعىنا بايلانىستى ەگىن شارۋاشىلىعىن ءارتاراپتاندىرۋ جۇمىسى قولعا الىنعاندىعىن جەتكىزدى.

جيىن سوڭىندا شارۋاشىلىق باسشىلارى پىكىرلەر ايتىپ, سۋدى ۇنەمدەۋ باعىتىندا اتقارىپ جاتقان جۇمىستاردى باياندالدى. ايماق باسشىسى قازاقستان رەسپۋبليكاسىنىڭ ەكولوگيا, گەولوگيا جانە تابيعي رەسۋرستار مينيسترلىگىنەن ۆەگەتاتسيالىق كەزەڭىندە جوعارىدان شاردارا سۋ قويماسىنا 2,7 ملرد تەكشە مەتر سۋ كولەمى ءتۇسۋىن قامتاماسىز ەتۋ جونىندە ۇسىنىس ءبىلدىردى.