ەلىمىزدە بالالار ءۇشىن اۋە بيلەتى تەگىن بولادى

بۇل باعدارلاما بويىنشا 2 جاستان 14 جاسقا دەيىنگى قازاقستاندىقتارعا اۋە بيلەتى تەگىن بەرىلەدى. 2022 جىلدىڭ قاڭتارىنان باستاپ توپ-10 تۋريستىك اۋماق باعىتتارى بويىنشا ساپاردى برونداۋعا بولادى.

«كيدس گوۋ فري» (بالالار تەگىن ساياحاتتايدى) باعدارلاماسىنىڭ نەگىزگى ماقساتى – قازاقستاندىقتاردى ەلىمىزدىڭ تۋريستىك باعىتتارىندا بۇكىل وتباسىمەن دەمالۋعا ىنتالاندىرۋ. بۇعان بالالاردىڭ اۋە بيلەتىن سۋبسيديالاۋ كومەكتەسەدى. مادەنيەت جانە سپورت مينيسترلىگىنىڭ بولجامىنشا, بۇل دەمالىستى 30 پايىزعا دەيىن ارزانداتۋعا مۇمكىندىك بەرەدى.

«زاڭ 2022 جىلدان باستاپ ورىندالادى, ويتكەنى زاڭناماعا سايكەس بيۋدجەتتىك قارجىلاندىرۋدى تالاپ ەتەتىن بارلىق نورما كەلەسى جىلدان باستاپ كۇشىنە ەنەدى. اتالعان زاڭعا قول قويىلدى, ەندى ەرەجەلەر جوباسى مەن ونىڭ جۇمىس ىستەۋ مەحانيزمى ازىرلەنىپ جاتىر. جىل باسىنان باستاپ قازاقستاندىق تۋروپەراتورلار «كيدس گوۋ فري» باعدارلاماسى قوسىلعان تۋرپاكەتتەردى ساتۋدى باستايدى. باعدارلامانى تالقىلاۋ جانە نارىقپەن كەلىسۋ بارىسىندا قانداي دا ءبىر تۇزەتۋلەر بولۋى مۇمكىن, بىراق ازىرگە وزگەرىستەر جوسپارلانباعان جانە ءبارى دە سول كۇيىندە قالىپ وتىر», دەدى مادەنيەت جانە سپورت مينيسترلىگى تۋريزم يندۋسترياسى كوميتەتىنىڭ توراعاسى داستان رىسپەكوۆ.

باعدارلاماعا قازاقستاننىڭ 14 جاسقا دەيىنگى ازاماتتارى قاتىسا الادى. «كيدس گوۋ فري» قوسىلعان تۋريستىك ءونىمدى ساتىپ الا وتىرىپ, بالالار تۋريستىك ورىنداردىڭ اۋماعىندا كەمىندە ءۇزىلىسسىز بەس كۇن جانە ءتورت ءتۇن تۇرۋعا مىندەتتى.