سەناتور ءالىمجان قۇرتاەۆ ەلىمىزدىڭ وڭتۇستىك ولكەسىنىڭ تۇرعىندارىن سولتۇستىك ايماققا قونىستاندىرۋ جونىندەگى «ەڭبەك» مەملەكەتتىك باعدارلاماسىنىڭ جۇزەگە اسۋ بارىسىن سىنعا الدى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
دەپۋتات پالاتانىڭ بۇگىنگى وتىرىسىندا جاريا ەتكەن دەپۋتاتتىق ساۋالىندا وسى ماسەلەنى كوتەردى. قۇرتاەۆتىڭ پىكىرىنشە, اكىمدىكتەر كوبىنەسە قونىس اۋدارۋشىلارعا ءومىر ءسۇرۋ مەن ەڭبەك ەتۋگە لايىقتى جاعداي جاساماي وتىر.
«كوشۋگە نيەت بىلدىرگەن وتباسى قونىس اۋدارۋشىلاردى قابىلدايتىن اۋداندار تۋرالى بارلىق اقپاراتقا تولىقتاي قول جەتكىزە المايدى. سوندىقتان ولاردىڭ تاڭداۋى شەكتەۋلى بولىپ وتىر. كەيبىر اكىمدىكتەر وتباسىن قالاعان اۋىلعا ەمەس, اكىمدىك ءوزى كورسەتكەن اۋىلعا جىبەرەدى. تاعى ءبىر ماسەلە - تۇرعىن ءۇي ماسەلەسى. كەيبىر وڭىرلەردە جاڭا جەكە تۇرعىن ۇيلەردى سالۋ جۇمىستارىمەن فەرمەرلىك شارۋاشىلىقتار اينالىسادى جانە ۇيلەردى رەسمي كەلىسۋ پروتسەسىن تولىق وتكىزبەستەن سالا بەرەدى. باق-تا جاريالانعان اقپاراتقا سايكەس, قۇرىلىستىڭ ساپاسى قويىلاتىن تالاپتارعا جاۋاپ بەرمەيدى», دەدى ءالىمجان قۇرتاەۆ.
سەناتوردىڭ ۇسىنىسى – ءتۇسىندىرۋ جۇمىستارىن كۇشەيتۋ. ول ءۇشىن كەم دەگەندە جىبەرۋشى جانە قابىلداۋشى سالالاردا Call-ورتالىقتار اشۋ قاجەت. وندا قونىس اۋدارۋشىلارعا تولىق اقپارات جانە ولارداعى بارلىق سۇراقتارعا جاۋاپتار بەرىلۋى كەرەك.
«اتالعان Call-ورتالىقتاردىڭ ءتيىمدى جۇمىس ىستەۋى ءۇشىن بوس جۇمىس ورىندارى, تۇرعىن ۇيمەن قامتاماسىز ەتۋ, كورسەتىلگەن وبلىستاردا شارۋاشىلىقتىڭ قانداي تۇرىمەن اينالىسۋعا بولاتىندىعى جانە ت.ب. ماسەلەلەر بويىنشا كوشۋگە نيەت بىلدىرگەن ازاماتتاردى حاباردار ەتە الاتىن مامانداردى تارتۋ قاجەت», دەدى ءالىمجان قۇرتاەۆ.
سەناتور بانك نەسيەلەرى بار كوشىپ-قونۋشىلارعا 6 ايدان 1 جىلعا دەيىنگى مەرزىمگە نەسيەلىك دەمالىس بەرۋدى ۇسىنىپ وتىر. بۇل كوبىنەسە كوشۋ پروتسەسىندە تۋىندايتىن قارىزداردان كەيىن ازاماتتارعا سۋبسيديا بەرۋدەن باس تارتىلاتىن بولعاندىقتان اسا ماڭىزدى.