قازاقستان رەسپۋبليكاسى تاۋەلسىزدىگىنىڭ 30 جىلدىعى قارساڭىندا باتىس قازاقستان وبلىسىنىڭ «جىگىت سۇلتانى – 2021» بايقاۋى ءوتىپ, جۇزدەن جۇيرىك, مىڭنان تۇلپار جىگىتتەر ەكى كۇن بويى سىنعا ءتۇستى.
كارانتين تالاپتارىنا سايكەس كورەرمەنسىز, ونلاين وتكەن بايقاۋعا باتىس قازاقستان وبلىسىنىڭ اقجايىق, بايتەرەك, جاڭاقالا, جانىبەك, قاراتوبە, سىرىم, تەرەكتى, شىڭعىرلاۋ, ءبورلى اۋداندارىنان جانە ورال قالاسىنان 10 ۇمىتكەر قاتىستى. دەم بەرىپ دەلەبە قوزدىراتىن جانكۇيەر بولماعانىمەن, باتىس قازاقستان وبلىسى اكىمدىگى, وبلىستىق مادەنيەت, ىشكى ساياسات, سپورت جانە دەنەشىنىقتىرۋ باسقارمالارى, ورال قالاسىنىڭ اكىمدىگى, قالالىق مادەنيەت جانە تىلدەردى دامىتۋ ءبولىمى, Nur Otan پارتياسى جانە وبلىستىق Aqjaiyk تەلەارناسى جان-جاقتى قولداعان ءىس-شارا جوعارى دەڭگەيدە ءوتتى.
بايقاۋعا قاتىسۋشىلار سايىستىڭ «قازاقتىڭ بالاسىمىن تەگى ءبۇتىن» دەپ اتالعان العاشقى كەزەڭىندە ءوزىن, اتا-تەگىن, وسكەن جەرىن تانىستىرسا, «اتتىڭ داڭقى جىگىت قولىندا, جىگىت داڭقى ءوز قولىندا» سىناعىندا اۋدارىسپاق, تەڭگە ءىلۋ, جامبى اتۋ سىندى ۇلتتىق ويىندارىنا قاتىستى. ۇمىتكەرلەردىڭ ىسمەرلىك, شەبەرلىك, قولونەر قاسيەتتەرىن كورسەتكەن «جىگىتتەر بار نارقاسقا...» سىناعى دا تارتىستى بولدى. اسا تارتىستى بۇل سايىس ورال قالاسىنىڭ ىرگەسىندەگى SABA ەتنوكەشەنىندە, «ورال» سپورت كلۋبىنىڭ ات سپورتى بولىمىندە ءوتتى.
«جىگىت سۇلتانى» سايىسىنا قازىلىق ەتكەن قازاقستان رەسپۋبليكاسى مادەنيەت سالاسىنىڭ ۇزدىگى, قۇرمانعازى اتىنداعى ورال مۋزىكا كوللەدجىنىڭ ديرەكتورى, كۇيشى نۇرجان سەرتەكوۆ بايقاۋعا قاتىسۋشىلاردىڭ بارلىعى دا ۇلكەن دايىندىقپەن كەلگەنىن ايتادى. جىگىتتەردىڭ وسالى جوق. مىسالى, شىڭعىرلاۋدان كەلگەن ماعجان, جەڭىسوۆ – اۋداندىق مادەنيەت, تىلدەردى دامىتۋ, دەنەشىنىقتىرۋ جانە سپورت ءبولىمى «شىڭعىرلاۋ» سپورت كلۋبىنىڭ ادىسكەرى بولسا, جاڭاقالالىق قولعانات سەرىكوۆ – جاڭاقالا اۋداندىق Jastar سپورت كلۋبىنىڭ ۇلتتىق ات سپورتى نۇسقاۋشىسى بولىپ قىزمەت ەتەدى ەكەن. اقجايىق اۋدانىنان كەلگەن شاپاعات ناۋرىزوۆ تا وڭاي شاعىلاتىن جاڭعاق ەمەس, اقجايىق اۋداندىق بالالار-جاسوسپىرىمدەر سپورت مەكتەبىنىڭ جاتتىقتىرۋشىسى بولىپ شىقتى. كۇش پەن ەپتىلىك سىنى ولاردىڭ وڭ جامباسىنا كەلگەنىمەن, وزگە ارىپتەستەرى دە قاراپ قالمادى. سىرىم اۋدانى بۇلدىرتى اۋىلدىق مادەنيەت ءۇيىنىڭ ادىسكەرى نۇرلىبەك ۋالياحمەتوۆ, ورال قالاسىنداعى «الاۋ» بالالار اۋلا كلۋبىنىڭ ۇيىرمە جەتەكشىسى ەرگەن نۇرلان, قاراتوبە اۋداندىق مادەني-دەمالىس ورتالىعىنىڭ حورمەيستەرى ساقتاعان مەملەكەتوۆ, جانىبەك اۋدانى جاقسىباي اۋىلى م.ب.ىقسانوۆ اتىنداعى مەكتەپ مۇعالىمى ەرنار ەرلانوۆ, بوكەي وردا اۋدانىنداعى شوڭاي اۋىلدىق كلۋبىنىڭ مەڭگەرۋشىسى راۋان قاجىعاليەۆ, ءبورلى اۋداندىق دەمالۋ ورتالىعىنىڭ كوپشىلىك ءىس-شارالار رەجيسسەرى ەراسىل مالىك, تۋعان جەرى بايتەرەك اۋدانىنىڭ نامىسىن قورعاعان ورال گۋمانيتارلىق-تەحنيكالىق كوللەدجىنىڭ ستۋدەنتى رايىمبەك سابىرعاليەۆ جەڭىستى قولدان بەرمەۋگە تىرىستى.
قازىلار القاسىنىڭ قۇرامىندا بولعان قازاقستان رەسپۋبليكاسى مادەنيەت سالاسىنىڭ ۇزدىگى, اكتەر, رەسپۋبليكالىق «جىگىت سۇلتانى» بايقاۋىنىڭ لاۋرەاتى مۇساعالي بەكتەنوۆ, قازاقستان رەسپۋبليكاسىنىڭ ەڭبەك سىڭىرگەن سپورت شەبەرى, سامبودان ءتورت دۇركىن الەم چەمپيونى, بقو ۇلتتىق سپورت فەدەراتسياسى قوعامدىق بىرلەستىگىنىڭ پرەزيدەنتى ەربولات بايباتىروۆ, «اعايىن» قازاق مادەني بىرلەستىگىنىڭ توراعاسى, ورال قالالىق ءماسليحاتىنىڭ دەپۋتاتى, حالىقتىق بيعاليەۆتەر وتباسىلىق ءانسامبلىنىڭ مۇشەسى ارمان بيعاليەۆ, ءحىV حالىقارالىق «شابىت» شىعارماشىل جاستار فەستيۆالىنىڭ لاۋرەاتى, ايماقتىق, رەسپۋبليكالىق «ۇكىلى دومبىرا» بايقاۋلارىنىڭ لاۋرەاتى, قۇرمانعازى اتىنداعى ساز مەكتەبىنىڭ وقىتۋشىسى اسلان سەرىكباەۆ سايىسقا بارىنشا ءادىل تورەلىك جاسادى.
سونىمەن, ەكى كۇنگە سوزىلعان سايىستىڭ باس جۇلدەسىن جاڭاقالالىق قولعانات تۇراربەك ۇلى جەڭىپ الدى. وعان 300 مىڭ تەڭگەلىك سەرتيفيكاتپەن بىرگە ارنايى دايىندالعان «جىگىت سۇلتانى – 2021» التىن بەلدىگى تابىس ەتىلدى.
ءبىرىنشى ورىن – شىڭعىرلاۋلىق ماعجان فايزوللا ۇلىنا, ەكىنشى جۇلدە – بايتەرەكتىك رايىمبەك ەسەنكەلدى ۇلىنا, ءۇشىنشى سىيلىق – اقجايىق اۋدانىنىڭ وكىلى شاپاعات بەكبولات ۇلىنا بۇيىردى.
ءبورلى اۋدانىنان كەلگەن ەراسىل ەرلان ۇلى, جانىبەكتىك ەرنار باۋىرجان ۇلى, قاراتوبەلىك ساقتاعان بەرىك ۇلى, تەرەكتىلىك الپامىس ەرمەك ۇلى, سىرىم اۋدانىنىڭ وكىلى نۇرلىبەك بەكبولات ۇلى, ورال قالاسىنان ەرگەن نۇرلان ۇلى سايىستىڭ ديپلومانتتارى اتاندى.
ءبىر ەرەكشەلىگى, جۇلدەگەرلەرگە بەرىلگەن سىيلىق تا سايىستىڭ اتاۋىنا ساي – تۇلكى تىماق, ەر-تۇرمان, قامشى, دومبىرا سىندى ۇلتتىق بۇيىمدار بولدى.
– بۇل بايقاۋ ءبىزدىڭ جاستارىمىزدىڭ اراسىندا سالاماتتى ءومىر سالتىن ناسيحاتتاپ, ۇلتتىق قۇندىلىقتارعا شاقىراتىنى ءسوزسىز. اق جايىقتىڭ جىگىتتەرى دۇنيەجۇزىلىك دودالاردا دا اتوي سالسا دەيمىز. ءوڭىرىمىز پاندەميا قىسپاعىندا تۇرعانىنا قاراماستان, ءبىز بۇل ماڭىزدى ءىس-شارانى ءوز دەڭگەيىندە وتكىزۋگە تىرىستىق. جىگىتتىڭ سۇلتانى مەن سىرتتانى كوپ بولسىن! – دەيدى باتىس قازاقستان وبلىسى اكىمىنىڭ ورىنباسارى باقىتجان نارىمبەتوۆ.