ەكى «سارىنىڭ» ايقاسى

اقش-تىڭ تەحاس شتاتىندا ورنالاسقان ارلينگتون قا­لاسىنداعى AT&T Stadium ستا­ديو­نىندا ۇيىمداستىرىلعان جەك­پە-جەك «كانەلونىڭ» سە­نىمدى جەڭىسىمەن اياقتالدى. 12 راۋندقا جوسپارلانعان ايقاستىڭ 8-راۋندىندا سوندەرستىڭ قا­باعى جارىلىپ, ءبىر راۋند بويى ءبىر كوزبەن جۇدىرىقتاسىپ شىق­تى. راۋندارالىق ۇزىلىستە دارى­گەرلەر بريتانيالىق بوكس­شىعا جەكپە-جەكتى ءارى قاراي جالعاستىرۋعا بولمايتىنىن ايتىپ, باپكەرلەرىنە كەزدەسۋدى وسى جەردەن توقتاتۋعا كەڭەس بەردى. ءسويتىپ مەكسيكالىق «سارى بالا» كەزەكتى قارسىلاسىن مەرزىمىنەن بۇرىن جەڭىپ, ەكىنشى ورتا سال­ماقتاعى ءۇش بىردەي بەلبەۋدىڭ يەگەرى اتاندى.

جالپى, «كانەلو» دا, سون­دەرس تە قازاقستاندىق بوكس جان­­­كۇيەرلەرىنە وتە جاقسى تانىس. ءبىرىنشىسى, وتانداسىمىز گەننادي گولوۆكينمەن ەكى رەت شارشى الاڭدا شەبەرلىك باي­قاسىپ, بىرەۋىندە تەڭ ءتۇسىپ, ەكىنشىسىندە تورەشىلەردىڭ شە­شىمى بويىنشا جەڭىپ كەتكەن.

ال ەكىنشىسى, GGG-مەن ورتا سالماقتاعى ءابسوليۋتتى الەم چەمپيونى اتاعى ءۇشىن وتەتىن جەكپە-جەككە ۇزاق ۋاقىت ساۋدالاسىپ, اقىر سوڭىندا جۇدىرىقتاسۋدان باس تارتىپ, گولوۆكيننىڭ ءتورت التىن بەلبەۋدىڭ باسىن قوسا­مىن دەگەن ارمانىن جوققا شىعارعان-دى. وسىنداي سە­بەپ­تەرمەن قازاقستاندىق بوكس جان­كۇيەرلەرىنىڭ اشۋىن تۋ­دىرعان ەكى بوكس­شى­نىڭ اراسىنداعى بۇل ايقاس­تى مەكسيكالىق جانە بريتانيالىق جانكۇيەرلەردەن كەيىن قازاقستاندىقتار دا تا­عاتسىزدانا كۇتكەن ەدى.جەكپە-جەك الدىندا بوكس ماماندارى دا, كاسىپقوي بوكس­تا ونەر كورسەتىپ جۇرگەن كانىگى بوكسشىلار دا «كانەلونىڭ» جەڭىسىنە سەنىمدى بولعانىمەن, ءبىراز ساراپشى سوندەرستىڭ بۇل جولعى دايىندىعى مەن جەڭىسكە دەگەن ەرەكشە قۇلشىنىسىن جو­عارى باعالاعان-تىن. سون­داي-اق سوندەرس جەڭەدى دەگەنگە بريتانيالىقتىڭ رينگ ۇزىن­دىعىن 7 مەترگە جۋىق بولسىن دەپ قيعىلىق سالۋى دا سەبەپ بولسا كەرەك. ويتكەنى بيللي كەڭ رينگتە ءوزىن سۋدا جۇزگەن با­لىقتاي ەركىن سەزىنەتىن جانە كوپ قارسىلاسىن ءدال وسىنداي رينگتە ويقاستاپ ءجۇرىپ وپ-وڭاي جەڭگەنىنە جانكۇيەرلەر تالاي مارتە كۋا بولعان ەدى. بىراق بۇل جولى سوندەرسكە رينگتىڭ كولەمى دە كومەكتەسە المادى. بري­تانيالىقتىڭ دەگەنىنە كونگەن الۆارەس: «رينگتىڭ كولەمىن ستاديونمەن بىردەي قىلسا دا, شارشى الاڭدا ونى ەشكىم قۇت­قارا المايدى», دەگەن بولاتىن.

جەكپە-جەكتىڭ العاشقى راۋندىن بارلاۋمەن وتكىزىپ, قار­سىلاسىنىڭ الەۋەتىن بايقاعان ساۋل الۆارەس ادەتتەگىدەي قال­عان بەس راۋندتى تولىق سون­دەرستىڭ ەركىنە بەردى. سەبەبى «كا­­نەلونىڭ» ماقساتى – سون­دەرسكە كوپ سوققى جاساۋىنا مۇم­كىندىك بەرىپ, شابۋىلداعان قارسىلاسىن شارشاتىپ الۋ ەدى. ال ءوزى قارىمتا شابۋىلعا يەك ارتىپ, تەك جەكپە-جەكتىڭ ەكىنشى بولىگىندە عانا ىسكە كى­رىسۋدى كوزدەدى. ناتيجەسىندە, 6-راۋندتان باستاپ ساۋل قار­سىلاسىن سوققىنىڭ استىنا الا باستادى. ءدال وسى راۋندتا «كانەلونىڭ» اپپەركوتتان, ياعني يەكتىڭ استىنان جاساعان اۋىر سوققىسى كوزدەگەن جەرىنە ءدوپ ءتيىپ, سوندەرستى ەسەڭگىرەتىپ جىبەردى. دەگەنمەن سوققىعا ءتو­زىمدى ەكەنىن كورسەتكەن بري­تانيالىق بوكسشى جىلدام ەس جيىپ ۇلگەردى. كەيىنگى ەكى راۋندتا دا الۆارەس ۇستەمدىك تانىتتى. ءسويتىپ 8-راۋندتان كەيىن سوندەرستىڭ باپكەرلەرى تورەشىگە شاكىرتىنىڭ جەكپە-جەكتى ءارى قاراي جالعاستىرا المايتىنىن ايتىپ, «كانەلونىڭ» جەڭىسىن مويىندادى. وسىلايشا, 30 جەكپە-جەكتىڭ بارلىعىندا جەڭىسكە جەتىپ, ونىڭ تەڭ جارتىسىنا جۋىعىندا قارسىلاستارىن مەرزىمىنەن بۇرىن تىزە بۇكتىرگەن سوندەرس كارەراسىنداعى ال­عاشقى جەڭىلىسىنە ۇشىرادى. ال «كانەلو» بولسا, كەزەكتى كەز­دە­سۋىن مەرزىمىنەن بۇرىن اياق­تادى.

وسى جەكپە-جەك الدىندا الۆارەس جۋرناليستەردىڭ «گو­لوۆكينمەن ءۇشىنشى رەت شارشى الاڭدا جولىعۋىڭ مۇمكىن بە؟», دەگەن ساۋالىنا: «ارينە, ەگەر گەننادي ەكىنشى ورتا سال­ماققا كوتەرىلەتىن بولسا, مەن تري­لوگياعا قارسى ەمەسپىن» دەگەن بولاتىن. بىراق سوندەرستى جەڭىپ, ەكىنشى ورتا سالماقتاعى ءۇش بەلدىگىن يەلەنگەننەن كەيىن مەكسيكالىق بوكسشىدا جا­ڭا ماقسات پايدا بولدى. ول ەندى وسى سالماقتاعى IBF بەل­بە­ۋىنىڭ چەمپيونى امەري­كا­لىق كالەبو پلانتومەن (21-0, 12 كو) كەزدەسىپ, ەكىنشى ورتا سال­ماقتاعى ءابسوليۋتتى الەم چەم­پيونى اتانباق نيەتتە.

ەگەر ال­داعى قىركۇيەك ايىندا «كا­نەلو» امەريكالىق بوكسشىمەن جۇدىرىقتاساتىن بولسا, وندا گولوۆكين ەكەۋىنىڭ اراسىنداعى ءۇشىنشى جەكپە-جەك مۇلدە ۇيىم­داستىرىلماۋى مۇمكىن.