تۇرعىندار سانى جىل سايىن ارتىپ, قاناتىن كەڭگە جايا تۇسكەن تۇپقاراعان اۋدانىنا قاراستى اقشۇقىر اۋىلىنداعى تۇرعىن ۇيلەر مەن ءارتۇرلى ماقساتتاعى عيماراتتار قاتارى 1 مامىر – قازاقستان حالقىنىڭ بىرلىگى كۇنىنە وراي جاڭا الەۋمەتتىك نىسانمەن تولىقتى.
ەل تاۋەلسىزدىگىنىڭ 30 جىلدىعىن اتاپ ءوتۋ اياسىندا پايدالانۋعا بەرىلگەن كوپ سالالى «سۇلەيمەن» سپورت كەشەنى سوڭعى ۇلگىدە سالىنعان. تۇپقاراعان اۋدانىندا سپورتتىق قۇرال-جابدىقتارمەن تولىق قامتىلعان 14 اشىق سپورت الاڭى, 5 فۋتبول الاڭى, 5 كوشە ترەناجەرى, 4 جابىق سپورت كەشەنى بار. بيىل ونىڭ قاتارى تاعى ءۇش بىردەي سپورت كەشەنىمەن تولىعادى. اقشۇقىردا سپورت نىساندارىنىڭ بىرەۋى جەرگىلىكتى بيۋدجەت قاراجاتىنا سالىنادى. سونداي-اق اقشۇقىر اۋىلىنداعى جاڭالىق بيىل اتالعان اۋداننىڭ باۋتين جانە قىزىلوزەن اۋىلدارىندا جالعاسىن تاۋىپ, بۇل اۋىلداردا دا سپورت كەشەندەرى بوي كوتەرمەك.
كەشە عانا اۋىل تۇرعىندارى مەن قوناقتارىنا, جالپى سپورت قۇمار قاۋىمعا ەسىگىن ايقارا اشقان زاماناۋي «سۇلەيمەن» سپورت كەشەنىندە 500 ادام بوكس, گيمناستيكا, سۋعا ءجۇزۋ سياقتى سپورتتىڭ بىرنەشە تۇرىمەن اينالىسا الادى. سپورت كەشەنى جەكپە-جەك تۇرلەرىن دامىتۋعا كۇش سالىپ جۇرگەن اتىمتاي ازامات يبراگيم اقدراشەۆتىڭ دەمەۋشىلىگىمەن سالىندى.
ماڭعىستاۋ وبلىسى