باتىس قازاقستاندا بلوك-بەكەتتەر ورناتىلدى

ىندەت باستالعالى بەرى وبلىستا كوروناۆيرۋس ينفەكتسياسى 19 809 رەت تىركەلگەن. ال 2021 جىلى قاڭتار ايىندا – 1 837, اقپان ايىندا – 1 950, ناۋ­رىز ايىندا – 2 138, ءساۋىر ايىندا 3 884 جاعداي ەسەپكە الىنعان ەكەن. كورىپ وتىرعانىمىزداي, ۆيرۋس جۇق­تىرعاندار سانى ايدان ايعا كوبەيىپ, ءساۋىر ايىندا ءتىپتى ءورشىپ كەتكەن.

– مامىر ايىنىڭ 5-ءى كۇنگى مالىمەت بويىنشا وبلىستا بارلىعى 19 809 ادام ۆيرۋس جۇقتىرعان, ونىڭ 11 372-ءسى – سيمپتومدى, ال 8 437 ادامدا ناۋ­قاس بەلگىلەرى جوق, سيمپتومسىز. بۇگىندە 15 506 ادام جازىلىپ شىقتى, وكىنىشكە قاراي, 289 ادام قايتىس بولدى, – دەيدى وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى ارمان قاليبەكوۆ.

سوڭعى تاۋلىكتە كوروناۆيرۋس جۇق­تىر­عان 129 ادام تىركەلسە, سوڭعى اپ­تا­داعى ناۋقاستار سانى 932 ادام بولىپ تۇر.

وكپەنى جاساندى جەلدەتۋ اپپاراتىنا 19 ادام قوسىلىپ, 23 ناۋقاس وت­تەگى كونتسەنتراتىنىڭ كومەگىنە جۇ­­گىن­گەن. وڭىردەگى 18 ينفەكتسيالىق ستاتسيوناردا 570 ادام ەم الىپ جاتىر ەكەن. بۇل – بارلىق كەرەۋەت سانىنىڭ 50,8%-ى. ال جانساقتاۋ مەكە­مەلەرىندەگى 65 ورىندا 40 ادامعا مەديتسينالىق جاردەم كورسەتىلىپ جاتىر. جالپى, كوروناۆيرۋسقا قارسى ەمدەۋ ورىندارىندا 1 444 كەرەۋەت بوس ورىن بار.

– 1-28 ءساۋىر ارالىعىندا 2 144 ادام تۇماۋ بەلگىلەرىمەن دارىگەرگە قارالىپ, ولاردان كوروناۆيرۋس انىقتالدى. بۇل ناۋقاستارمەن جاقىن قارىم-قاتىناستا بولعان ادامداردى تەكسەرۋ كەزىندە تاعى 1 098 ادامنىڭ ۆيرۋس جۇقتىرعانى بەلگىلى بولدى, – دەيدى باتىس قازاقستان وبلىستىق سانيتارلىق-ەپيدەميولوگيالىق باقىلاۋ دەپار­تامەنتى باسشىسىنىڭ ورىنباسارى نۇرلىبەك مۇستاەۆ.

26 ءساۋىر كۇنگى ناتيجەلەر بو­يىنشا ءبورلى, بايتەرەك, قازتالوۆ, تەرەكتى, جاڭاقالا, شىڭعىرلاۋ اۋداندارى جانە ورال قالاسى ەڭ قاۋىپتى «قىزىل ايماقتا» قالىپ وتىر.

ۆيرۋس جۇقتىرعانداردىڭ ەڭ كوبى, ياعني 35,2%-ى – جۇمىس ىستەيتىن ادامدار. بىراق باسقا توپ تا از ەمەس. سوڭعى ءبىر اي ىشىندە 975 زەينەتكەر, 908 جۇمىسسىز ازامات, 293 وقۋشى, 75 مەديتسينا قىزمەتكەرى, 89 مۇعالىم, بالاباقشاعا بارمايتىن 69 بالا, بالاباقشاعا باراتىن 28 بالا, 18 تاربيەشى, 53 ستۋدەنت اۋىرعان.

وقۋ جىلى باستالعالى وقۋ­شىلار مەن مەكتەپكە دەيىنگى سابي­لەر اراسىندا 1 014 مارتە COVID-19 وقيعا­سى انىق­تالعان ەكەن. ماسەلەن, قىر­كۇيەك ايىندا 4 وقيعا, قازاندا 5 وقيعا, قاراشا ايىندا 102 وقيعا, جەلتوق­ساندا 78 وقيعا بولسا, 2021 جىلى ۆي­رۋس جۇقتىرعاندار سانى 809-عا جەتكەن.

وڭىردەگى ءىرى كاسىپورىندارداعى جاع­داي دا قاتاڭ باقىلانىپ وتىر. ماسەلەن, «جايىق مۇناي» كومپانيا­سىندا جىل باسىنان بەرى 38 ناۋقاس انىقتالعان, مۇنىڭ 11-ءى ۆاحتاعا كەلگەن جۇمىسشىلاردان تابىلسا, 27-ءسى جۇمىستان تىس كەزدە ءوز بەتىمەن دارى­گەرگە قارالىپ, انىقتالعان جاعداي ەكەن. ال تىكەلەي كەنىش باسىندا, قىز­مەت كەزىندە اۋىرىپ قالعان وقيعا تىركەل­مەگەن.

«قاراشىعاناق پەترولەۋم وپەرەيتينگ»­ كومپانياسىندا جىل باسى­نان بەرى 116 ناۋقاس تىركەلگەن. ونىڭ ىشىندە 45 ادام ۆاحتالىق كەزەگى ءبىتىپ, ۇيىنە قايتاردا تەك­سەرىلگەن كەز­دە كوروناۆيرۋس جۇق­تىرعانى انىق­تالعان.

وڭىردە سانيتارلىق-دەزينفەك­تسيا­لىق رەجىم تالاپتارىن بۇ­زۋ فاكتى­لەرىن قاداعالايتىن موني­تورينگتىك توپ­تار 1 ساۋىردەن بەرى 634 مارتە رەيد جۇرگىزىپ, 3 422 نىسان­دى تەكسەرگەن ەكەن. ناتيجەسىندە, 34 نىساندا تالاپ بۇزۋشىلىقتار انىق­تال­عان. ولارعا 130 حاتتاما تولتىرىلىپ, 8 284 280 تەڭگەگە ايىپپۇل سالىندى.

وبلىستا كوروناۆيرۋسقا قارسى ەكپە جۇرگىزۋ ءىسى 1 ساۋىردە باستالعان. ارمان قاليبەكوۆتىڭ ايتۋىنشا, وسى ۋاقىتقا دەيىن وبلىسقا ۆاكتسينانىڭ 62 700 دوزاسى كەلىپ تۇسكەن. قازىردىڭ وزىندە 49 287 ادام ەكپەنىڭ العاشقى دوزاسىن, 17 891 ادام ەكىنشى دوزاسىن الىپ ۇلگەرگەن.

وتكەن سارسەنبىدەن باستاپ ورال قالاسىندا ءموبيلدى ەكپە بەكەتتەرى تۇرعىنداردى جاپپاي ۆاكتسينالاۋ ىسىنە كىرىسكەن. ياعني جىلجىما­لى مە­دي­تسينالىق كەشەندەر وبلىس ورتا­لىعىنىڭ ءىرى-ءىرى ساۋدا ور­تالىق­تارى جانىندا تۇرىپ, كەز كەلگەن ادامعا ءوز قالاۋى بويىنشا ەكپە سالادى. ول ءۇشىن كەلۋشىنىڭ جەكە كۋالىگى بولسا جەتكىلىكتى. ەك­پە العان ادام 30 مينۋت دارىگەر باقىلاۋىندا بولادى. ول وتان­دىق نەمەسە رەسەيلىك ۆاكتسينا الا­تىنىن ءوزى تاڭدايدى.

جوعارىدا ايتقانىمىزداي, 1 ما­مىر­دان باستاپ ورال قالاسى, سون­داي-اق اقجايىق, بايتەرەك, ءبورلى, قاز­تالوۆ, تەرەكتى جانە شىڭ­عىرلاۋ اۋدان­دارىنا كىرەبەرىسكە, بارلىعى 7 ورىنعا بلوكبەكەت ورناتىلدى. بۇل بەكەتتەردەن حالىقتىڭ تىنىس-تىرشى­لىگىن قامتاماسىز ەتە­تىن ۇيىم-مەكە­مە قىزمەتكەرلەرى, مە­ديتسينالىق ۇيىم­داردا ەم الۋشىلار, جۇك تاسىمالداۋشىلار جانە ترانزيتتىك جولاۋشى­لار, ۆاحتا جۇمىسشىلارى جانە ولار­دى تاسىمالدايتىن كولىكتەر كەدەر­گىسىز وتە الادى. سونداي-اق كوك­تەمگى دالا جۇمىستارىمەن شۇعىل­دانۋشىلار دا بۇل ساناتقا كىرەدى. باتىس قازاقستان وبلىستىق باس مەم­لەكەتتىك سانيتار دارىگەرىنىڭ ورىنباسارى نۇرلىبەك مۇستاەۆتىڭ ايتۋىن­شا, اۋرۋ كورسەتكىشى تو­مەندەپ, جاع­داي تۇزەلەر بولسا, ءبىر اپتا ىشىندە بەكەت­تەردى الىپ تاستاۋ ماسەلەسى قايتا قارالادى ەكەن.

باتىس قازاقستان وبلىسى