بۇگىن حالىقارالىق تۇركى اكادەمياسىنىڭ پرەزيدەنتى دارحان قىدىرالى قىرعىز رەسپۋبليكاسىنىڭ سىرتقى ىستەر ءمينيسترى رۋسلان كازاكباەۆپەن تەلەفون ارقىلى سويلەستى, دەپ حابارلايدى Egemen.kz حالىقارالىق تۇركى اكادەمياسىنىڭ ءباسپاسوز قىزمەتىنە سىلتەمە جاساپ.
اڭگىمەلەسۋ بارىسىندا اكادەميا باسشىسى باتكەندەگى قايعىلى وقيعاعا بايلانىستى تاعى دا كوڭىل ايتىپ, قاشاندا باۋىرلاس قىرعىز ەلىنىڭ جانىندا ەكەنىن جەتكىزدى.
سونداي-اق دارحان قىدىرالى سىرتقى ىستەر ءمينيسترىن بۇگىنگى قىرعىز رەسپۋبليكاسىنىڭ كونستيتۋتسياسى كۇنىمەن جانە ەلدىڭ رەفەرەندۋم ارقىلى قابىلدانعان جاڭا اتا زاڭى بويىنشا پرەزيدەنتتىك باسقارۋ جۇيەسىنە وتۋىمەن قۇتتىقتادى.
ءوز كەزەگىندە رۋسلان كازاكباەۆ باتكەندەگى احۋال جونىندە مالىمەت بەرىپ, بىلدىرگەن قولداۋى مەن قۇتتىقتاۋى ءۇشىن اكادەميا باسشىسىنا العىس ايتتى.