بىشكەككە تۇركىستان ارقىلى رەيستەر 31 مامىردان باستاپ اشىلادى, دەپ حابارلايدى,Egemen.kz.
قازاقستاندىق Flyarystan لوۋكوستەرىنىڭ ءباسپاسوز قىزمەتىنىڭ مالىمەتىنشە, الماتى مەن نۇر-سۇلتاننان تۇركىستان ارقىلى بىشكەككە تۇراقتى رەيستەر اپتاسىنا ەكى رەت - 31 مامىردان باستاپ دۇيسەنبى جانە بەيسەنبى كۇندەرى جۇزەگە اسىرىلادى. بيلەتتەردى قازىر ءموبيلدى قوسىمشانىڭ كومەگىمەن نەمەسە كومپانيانىڭ رەسمي سايتىنان ساتىپ الۋعا بولادى.
لوۋكوستەردىڭ كوممەرتسيالىق ديرەكتورى جانار جايلاۋوۆانىڭ ايتۋىنشا, حالىقارالىق باعىتتاردى ارتتىرۋ فلوتتىڭ كەڭەيۋىنىڭ ارقاسىندا مۇمكىن بولدى. مامىر ايىندا كومپانيا 10-شى Airbus A320-نى قوستى.
ء«بىز قىرعىزستان مەن قازاقستان اراسىندا كەدەرگىسىز جۇرۋگە مۇمكىندىك بەرەتىن جاڭا حالىقارالىق رەيستى ۇسىنا وتىرىپ, مارشرۋتتىق جەلىنىڭ كەڭەيتىلگەنى تۋرالى قۋانا حابارلايمىز. قولجەتىمدى تاريفتەر مەن ءمىنسىز توعىسۋلار قازاقستاندىقتار ءۇشىن نۇر-سۇلتان مەن الماتىدان تۇركىستان ارقىلى بىشكەككە ساياحاتتاۋعا كوبىرەك مۇمكىندىك بەرەدى» دەدى ول.
ايتا كەتەيىك, FlyArystan ۇشاقتارى قازاقستاننىڭ 14 قالاسى اراسىندا رەيستەردى ورىندايدى, ال ناۋرىز ايىندا كومپانيا تۇركىستاندى ىستامبۇلمەن بايلانىستىرىپ, 2 مامىردا اتىراۋ, اقتاۋ جانە نۇر-سۇلتان قالالارىنان گرۋزيالىق كۋتايسيگە تۇراقتى رەيستەردى ورىنداي باستادى.