كونە تاراز شاھارىن قاق جارىپ, تالاس وزەنى اعىپ جاتىر. ەجەلدەن تاراز بەن تالاس بىرگە اتالادى. ەل اراسىندا «قاراتاۋدىڭ قۇشاعىندا قىرىق بۇلاق بار بولسا, تالاس وزەنىنىڭ قىرىق ساعاسى بار», دەگەن ءسوز بار. اتاقتى مايكوت اقىن قۇلمامبەت اقىنمەن ايتىسىندا دا تالاس وزەنىن جىرعا قوسادى. جالپى, اتالعان وزەننىڭ تاريحى تىم ارىدەن باستاۋ الادى دەسەك تە بولادى.
ماسەلەن, ەرتەدە تاراز سۇلۋلارىن جىرعا قوسقان ۇلى شىعىس شايىرلارى دا وسى تالاس تۋرالى تەبىرەنبەي جازا الماعان. عاشىقتىق عازالدارىنا قوسىپ ورگەن تالاستىڭ تۇمسا تابيعاتى, تۇنىق جاراتىلىسى سوزبەن سالىنعان سۋرەت بولىپ تۇنىپ تۇر.
كەزىندە تابيعاتتىڭ وسى ءبىر بايلىعىن ءتيىمدى پايدالانۋ كەرەكتىگى ءجيى ايتىلاتىن. شىندىعىنا كەلگەندە, تالاس وزەنى اعىپ جاتقان اۋماقتىڭ ءوزى دە تامىلجىپ, بارلىق سۇلۋلىققا سۇرانىپ تۇر. الدىندا تاراز اۋماعىنداعى «تەكتۇرماس» تاريحي-مادەني كەشەنىن جاڭعىرتۋ جۇمىستارى جۇرگىزىلگەن بولاتىن. بۇل دا وسى تالاس وزەنىنىڭ اۋماعىندا ورنالاسقان. ەندى اتالعان كەشەندى جاڭعىرتۋدىڭ ءۇشىنشى كەزەڭى دە جۇزەگە اسا باستادى. تالاس وزەنىنىڭ بويىندا قالا تۇرعىندارىنىڭ تىنىعۋىنا ارنالعان جاعالاۋ جۇمىستارى دا بۇل كۇندە اياقتالعان. اتالعان جاعالاۋدىڭ ۇزىندىعى 423 مەتردى قۇرايدى. سونىمەن قاتار, مۇندا جايلى ورىندىقتار ورناتىلعان. جۇمىس بارىسىندا تابيعي لاندشافت بارىنشا ساقتالعان. ال قولدان جاسالعان قۇزداردان سارقىراپ اققان سارقىراما كورەر كوزگە ادەمى اسەر سىيلايدى. وعان سۋ ارنايى قازىلعان قۇدىقتاردان قۇيىلىپ جاتىر. ەندى تالاس وزەنىنىڭ قاراما-قارسى جاعالاۋىن اباتتاندىرۋ جوباسى دا دايىن تۇر ەكەن. كوپ ۇزاماي ول دا ىسكە اساتىن بولادى.
جامبىل وبلىسى