وتكەن سەنبىدە ءۇندىستاندا 400 مىڭنان استام ادام كوروناۆيرۋس جۇقتىرعانى انىقتالدى. بۇعان دەيىن مۇنداي جاعداي الەمنىڭ ەشبىر مەملەكەتىندە كەزدەسپەگەن ەدى.
وسىلايشا, پاندەميا باستالعالى بەرى ۇندىستانداعى ناۋقاستار سانى 19 ميلليوننان اسىپ جىعىلدى. ايتا كەتەرلىگى, ونىنشى كۇن قاتارىنان قاۋىپتى دەرتتىڭ تىرناعىنا ىلىنگەندەر سانى 300 مىڭنان اسىپ ءتۇستى.
بۇدان بولەك سەنبىدە ەلدە 4 مىڭعا جۋىق ادام قازا تاپسا, جالپى كوز جۇمعاندار سانى 215 مىڭعا جۋىقتادى.
قازىرگە دەيىن ءۇندىستاندا 154 ميلليون ادامعا عانا ۆاكتسينا سالىنعان. 27 ميلليون تۇرعىن ەكپەنىڭ ەكىنشى دوزاسىن الىپتى. بۇل – جالپى حالىقتىڭ 2,1 پايىزىن قۇرايدى. وزدەرىڭىزگە ءمالىم, ەلدە 1,3 ميلليارد ادام مەكەندەيدى.
جالپى, ەل بيلىگى ۆاكتسينا سالۋدى بيىلعى 16 قاڭتاردا باستاعان ەدى. وتكەن اپتادان باستاپ 18 جاستان اسقانداردىڭ بارىنە ەكپە ەكتىرۋ مىندەتتى بولماق.
دەليدە 19 ساۋىردە ەنگىزىلگەن لوكداۋن تاعى دا ۇزارتىلدى. نەگىزى العاشقى كارانتيندىك شارالار 26 ساۋىردە اياقتالۋى ءتيىس ەدى. قالا اكىمشىلىگى ەپيدەميالىق احۋالدى ەسكەرە كەلە, لوكداۋندى 10 مامىرعا دەيىن ۇزارتۋعا شەشىم قابىلدادى.
كەي مالىمەتتەرگە سۇيەنسەك, ءۇندىستاندا ۆاكتسينا قورى تاۋسىلا باستاعان. وسىعان بايلانىستى, تاياۋدا ەل بيلىگى رەسەيدەن سپۋتنيك V ۆاكتسيناسىنىڭ 150 مىڭ دوزاسىن الدىرتتى. سىرتقى ىستەر مينيسترلىگىنىڭ وكىلى اريندام باگچيدىڭ ايتۋىنشا, الداعى ۋاقىتتا رەسەيدەن ميلليونداعان دوزا ۆاكتسينا اكەلىنبەك.
«جىعىلعانعا – جۇدىرىق» دەمەكشى, وتكەن اپتادا كوروناۆيرۋسپەن اۋىرعاندار ەمدەلىپ جاتقان اۋرۋحانادا ءورت شىعىپ, 18 ادام وتقا وراندى.