قمدب توراعاسى, باس ءمۇفتي ناۋرىزباي قاجى تاعان ۇلى قازاقستاندىقتاردى 1 مامىر كۇنىمەن قۇتتىقتادى, دەپ حابارلايدى Egemen.kz
قادىرلى وتانداستار!
بارشاڭىزدى قازاقستان حالىقتارىنىڭ بىرلىگى مەرەكەسىمەن شىن جۇرەكتەن قۇتتىقتايمىن! ءار شاڭىراققا شاتتىق, مول باقىت, مىقتى دەنساۋلىق, بىرلىك پەن تاتۋلىق تىلەيمىن.
بىرىنشىدەن, بۇگىنگى سىندارلى ساتتە ەڭ اۋەلى ءار وتباسىندا ءوزارا سۇيىسپەنشىلىك پەن سىيلاستىق, بىرلىك پەن قۇرمەت سىندى قۇندىلىقتاردى ارتتىرۋدىڭ ماڭىزى ەرەكشە. بۇل ماسەلەگە اسقان جاۋاپكەرشىلىكپەن قاراعان ابزال. وتاننىڭ ءوزى وتباسىدان قۇرالادى ەمەس پە؟ حالقىمىز: «وتان – وتباسىدان باستالادى», – دەيدى.
ەكىنشىدەن, ۇجىمداعى بىرلىكتى نىعايتۋعا ءمان بەرىلسە. بۇل رەتتە ءتۇرلى سالا باسشىلارىنا كوپ مىندەت جۇكتەلەدى. ۋاقىتىنىڭ كوپ بولىگىن جۇمىستا وتكىزەتىن ازاماتتار اراسىندا ءوزارا سىيلاستىق سىندى ادامگەرشىلىك قۇندىلىقتار قالىپتاسسا, بۇل جاعداي وتباسى مەن قوعامداعى بىرلىككە وڭ اسەر ەتەدى.
ۇشىنشىدەن, اعايىن اراسىنداعى تاتۋلىققا ءمان بەرسەك. قۋانىش پەن قايعىدا بىرگە بولۋ – تۋىستىق قارىم-قاتىناستى ارتتىراتىن ادامگەرشىلىك قاسيەت.
تورتىنشىدەن, قوعامدىق بىرلىك – اسا ماڭىزدى ماسەلەنىڭ ءبىرى. بۇعان ءار ازامات ۇلەس قوسۋى ءتيىس دەپ ەسەپتەيمىن. ويتكەنى, ەلىمىزدىڭ يگىلىگى مەن بىرلىگىنە ۇلەس قوسۋ – ءوز بولاشاعىمىزعا ۇلەس قوسۋ.
قۇرمەتتى جاماعات!
اللا تاعالا قاسيەتتى قۇراندا بىزدەرگە: «اللانىڭ جىبىنەن مىقتاپ ۇستاڭدار, اجىراپ بولىنبەڭدەر («الي-يمران» سۇرەسى, 103-ايات), – دەپ بۇيىرسا, ال ارداقتى پايعامبارىمىز مۇحاممەد (وعان اللانىڭ سالاۋاتى مەن سالەمى بول): «مەن ورتالارىڭنان كەتكەننەن كەيىن باياعى بىتپەيتىن ۇرىس-كەرىسكە, داۋ-دامايعا قايتا بوي الدىرماڭدار», – دەپ قاشان دا بىرلىك تۋى استىندا بولۋدى وسيەت ەتكەن. وسى رەتتە بارشاڭىزدى ءوزارا باۋىرمال بولۋعا شاقىرامىن.
جاراتۋشى جاببار يەمىز حالقىمىزدىڭ بىرلىگى مەن ىنتىماعىن باياندى ەتكەي. بىرلىگىمىز بەكەم بولعاي. ءامين!