دۋشانبە قالاسىندا (تاجىكستان) قازاقستان رەسپۋبليكاسى پرەزيدەنتىنىڭ كومەكشىسى – قاۋىپسىزدىك كەڭەسىنىڭ حاتشىسى اسەت يسەكەشەۆ ۇجىمدىق قاۋىپسىزدىك شارتى ۇيىمىنىڭ (ۇقشۇ) قاۋىپسىزدىك كەڭەستەرى حاتشىلارىنىڭ وتىرىسى بارىسىندا ۇيىمعا مۇشە مەملەكەتتەردەگى ءوز ارىپتەستەرىمەن ەكىجاقتى كەزدەسۋلەر وتكىزدى.
تاجىكستان رەسپۋبليكاسى قاۋىپسىزدىك كەڭەسىنىڭ حاتشىسى ن.ماحمۋدزودامەن كەزدەسۋدە اۋعانستانداعى احۋالدى ەسكەرە وتىرىپ, وڭىرلىك قاۋىپسىزدىكتى نىعايتۋ ماسەلەلەرى قارالدى. ءوزارا ءىس-قيمىلدى, ونىڭ ىشىندە, زاڭسىز كوشى-قون مەن ەسىرتكى ترافيگىنە قارسى كۇرەس باعىتىن ودان ءارى جانداندىرۋ قاجەت ەكەنى ايتىلدى.
رەسەي فەدەراتسياسى قاۋىپسىزدىك كەڭەسىنىڭ حاتشىسى ن.پاترۋشەۆپەن كەلىسسوزدەر بارىسىندا وڭىرلىك جانە جاھاندىق قاۋىپسىزدىكتىڭ وزەكتى ماسەلەلەرى, ەكى ەلدىڭ ءتيىستى مەملەكەتتىك ورگاندارىنىڭ تەرروريزمگە جانە ءدىني ەكسترەميزمگە قارسى ءىس-قيمىلى, اسكەري-تەحنيكالىق ىنتىماقتاستىق باعىتىنداعى ءوزارا بايلانىستارى تالقىلاندى. ترانسشەكارالىق وزەندەردىڭ ەكوجۇيەسى مەن سۋ رەسۋرستارىن ساقتاۋ ماسەلەلەرى قوزعالدى, اتاپ ايتقاندا, جايىق وزەنىنىڭ جاعدايى ءسوز بولدى.
كەزدەسۋ ناتيجەلەرى بويىنشا تاراپتار 2021-2022 جىلدارعا ارنالعان قازاقستان مەن رەسەي قاۋىپسىزدىك كەڭەستەرى اپپاراتتارى اراسىنداعى ىنتىماقتاستىق جوسپارىنا قول قويدى.
بەلارۋس رەسپۋبليكاسى قاۋىپسىزدىك كەڭەسىنىڭ مەملەكەتتىك حاتشىسى ا.ۆولفوۆيچپەن جانە ارمەنيا رەسپۋبليكاسى قاۋىپسىزدىك كەڭەسىنىڭ حاتشىسى ا.گريگوريانمەن قازىرگى زامانعى قاۋىپ-قاتەرلەرگە قارسى تۇرۋ ءۇشىن ارىپتەستىكتى نىعايتۋ بويىنشا پىكىر الماستى, سونداي-اق, ەكى ەل قاۋىپسىزدىك كەڭەستەرى اپپاراتتارىنىڭ اراسىنداعى ىنتىماقتاستىق جوسپارىنىڭ جۇزەگە اسىرىلۋى تالقىلاندى.