قازاقستاندىق تەننيسشى گريگوري لوماكين مىسىر استاناسى – كايردە وتكەن ITF Men M15 Cairo ءتۋرنيرىنىڭ جۇپتىق سىنىندا باس جۇلدەنى جەڭىپ الدى.
قازاقستان تەننيس فەدەراتسياسىنىڭ مالىمەتى بويىنشا, 23 جاستاعى تەمىرتاۋلىق سپورتشى جۇلدە قورى 15 مىڭ اقش دوللارىن قۇراعان دوداعا قازاقستان قۇراماسىنان جالعىز ءوزى قاتىسقان. جارىستا 25 جاستاعى گەرمانيالىق سپورتشى كاي ۆەحنەلتپەن جۇپ قۇراپ ونەر كورسەتكەن جەرلەسىمىز بارلىق كەزدەسۋىن جەڭىسپەن اياقتاعان. قازاقستاندىق-گەرمانيالىق جۇپ فينالدا ارگەنتينالىق حۋان يگناسيو گاپارسۋ مەن حۋان پابلو پاستان ەكى سەتتە 6:4, 6:2 ەسەبىمەن باسىم ءتۇسىپ, حالىقارالىق جارىستا توپ جارىپ وتىر.
گ.لوماكين مەن ك.ۆەحنەلت ىرىكتەۋ كەزەڭىندە يتاليالىق دانيەلي كاپەچچي مەن فرانچەسكو پاسسارونى ءۇش سەتتە 3:6, 6:3, 10:5 ەسەبىمەن جەڭىپ جارىس جولىنان ىعىستىرسا, شيرەك فينالدا جاپونيالىق سپورتشىلار شوحەي چيكامي مەن ريمپەي كاۆاكاميدى ەكى سەتتە 6:2, 7:6 جانە جارتىلاي فينالدا امەريكالىق وليۆەر كروۋفورد پەن گەرمانيالىق بەنەديكتى ءۇش سەتتە 3:6, 6:3, 10:8 ناتيجەسىمەن تىزە بۇكتىردى.