ءبىرىنشى ورتا سالماقتا جۇدىرىقتاساتىن قازاقستاندىق بوكسشى باتىر جۇكەمباەۆ كاسىپقوي بوكستاعى كەزەكتى جەكپە-جەگىن 29 مامىردا اقش-تا وتكىزەتىن بولدى. بۇل تۋرالى بوكسشىنىڭ ءوزى مالىمدەدى.
بىردەن ايتا كەتەيىك, بۇل كوپ – جەكپە-جەكتىڭ ءبىرى ەمەس. جۇكەمباەۆ كاسىپقوي رينگتە 2015 جىلدان بەرى كۇش سىناسىپ ءجۇر. سول كەزدەن بەرى 18 رەت شارشى الاڭعا شىعىپ, بارلىق باسەكەدە مەرەيى ۇستەم بولعان. 14 قارسىلاسىن نوكاۋتپەن ۇتتى. بۇعان دەيىن تەك كانادادا جۇدىرىقتاسقان وتانداسىمىز ەندى العاش رەت اقش شارشى الاڭىندا ونەر كورسەتپەك.
قانداسىمىز سوڭعى كەزدەسۋىن بىلتىر 25 قاڭتاردا كانادادا وتكىزىپ, مەكسيكالىق ريكاردو لارانى ەكىنشى راۋندتا تەحنيكالىق نوكاۋتپەن جەڭدى. قازىرگى كەزدە باتىر – WBA Continental جانە IBF Inter-Continental بەلبەۋلەرىنىڭ يەگەرى. الداعى ايقاستا وتانداسىمىز پۋەرتو-ريكو وكىلى سابريەل ماتياسپەن جۇدىرىقتاسادى. بۇل جەكپە-جەكتە جەڭىسكە جەتكەن بوكسشى IBF نۇسقاسىنىڭ چەمپيوندىق اتاعىنان ۇمىتكەر اتانادى. بوكس كەشى اقش-تىڭ لوس-اندجەلەس قالاسىندا وتەدى دەپ جوسپارلانعان.
باتىر جۇكەمباەۆتىڭ قارسىلاسىنا توقتالار بولساق, 29 جاستاعى سابريەل ماتياستىڭ كاسىپقويلار اراسىندا جۇدىرىقتاسىپ جۇرگەنىنە التى جىلعا جۋىقتادى. سول ارالىقتا 17 كەزدەسۋ وتكىزىپ, ونىڭ 16-سىندا قارسىلاستارىن مەرزىمىنەن بۇرىن جەڭگەن. تەك ءبىر جەكپە-جەگىندە عانا جەڭىلىستىڭ كەرمەك ءدامىن تاتۋعا ءماجبۇر بولعان.