بۇگىن دەنساۋلىق ساقتاۋ ءبىرىنشى ۆيتسە-ءمينيسترى مارات شورانوۆ نۇر-سۇلتان قالاسىنىڭ № 9 ەمحاناسى بازاسىندا قازاقستاندا ازىرلەنگەن جانە وندىرىلگەن QazVac كوروناۆيرۋستىق ينفەكتسياعا قارسى ۆاكتسينانى العاشقىلاردىڭ ءبىرى بولىپ الدى, دەپ حابارلايدى Egemen.kz
حاتتاماعا سايكەس, م.شورانوۆ مەديتسينالىق تەكسەرۋدەن ءوتىپ, دارىگەردىڭ قورىتىندىسىنان كەيىن ەگۋ كابينەتىنە باردى. رەسەيلىك سپۋتنيك V ۆاكتسيناسىنان ايىرماشىلىعى, ءبىر QazVac قۇتىسى ءبىر ادامعا ارنالعان.
ۆاكتسيناتسيادان كەيىن ءبىرىنشى ۆيتسە-مينيستر 30 مينۋت مەديتسينالىق باقىلاۋدا بولدى.
«بۇگىننەن باستاپ قازاقستاندىق ۆاكتسينا ءبىزدىڭ ازاماتتار ءۇشىن قولجەتىمدى. 50 مىڭ دوزادان تۇراتىن ءبىرىنشى پارتياسى وڭىرلەرگە جونەلتىلدى. وزدەرىڭىز بىلەتىندەي, بۇرىن مەنىڭ ارىپتەستەرىم اجار عينيات پەن ەرلان قياسوۆ سپۋتنيك V ۆاكتسيناسىن ءبىرىنشى بولىپ سالدىرعان. بۇگىن ءبىز دەنساۋلىق ساقتاۋ ءمينيسترى الەكسەي ۆلاديميروۆيچپەن بىرگە ازاماتتارعا پرەپاراتتىڭ قاۋىپسىز ەكەنىن كورسەتۋ ءۇشىن وتاندىق ءوندىرىستىڭ ۆاكتسيناسىن الدىق», دەپ اتاپ ءوتتى م.شورانوۆ.
ءبىرىنشى ۆيتسە-مينيستر ءوزىن جاقسى سەزىنەتىنىن ايتتى.
ەستەرىڭىزگە سالا كەتەيىك, مەملەكەت باسشىسىنىڭ 2021 جىلعى 26 قاڭتارداعى تاپسىرماسىن ورىنداۋ ءۇشىن حالىقتى جاپپاي ۆاكتسيناتسيالاۋدى قامتاماسىز ەتۋ ءۇشىن بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى بازاسىندا قازاقستاندىق COVID-19 ۆاكتسيناسىنىڭ العاشقى پارتياسى QazCovid-in (QAZVAC) شىعارىلدى.
«سق-فارماتسيا» بىرىڭعاي ديستريبيۋتورىنىڭ حابتارىنا 50 مىڭ دوزا كولەمىندە وتاندىق ۆاكتسينانىڭ ءبىرىنشى پارتياسىن جەتكىزۋ 23 ساۋىردە جۇزەگە اسىرىلدى. ونىڭ ىشىندە 6 000 دوزانى نۇر-سۇلتان مەن الماتى, 4 000 دوزادان – شىمكەنت, قاراعاندى, شىعىس قازاقستان جانە الماتى وبلىستارى الادى. قالعان وڭىرلەرگە ەكى مىڭ دوزادان تۇسەدى.
ءمينيستردىڭ ۆاكتسينا سالدىرعان ءساتى ۆەدومستۆونىڭ Facebook-تەگى رەسمي پاراقشاسىندا تىكەلەي ەفيردە ءوتتى.