قاراعاندى وبلىسىندا بالىق جانە اۋىل شارۋاشىلىعى جانۋارلارىنا ارنالعان ازىقتاردى ءوندىرۋ جانە قايتا وڭدەۋ بويىنشا قۇراما جەم زاۋىتىن سالۋ بويىنشا ينۆەستيتسيالىق جوبا ىسكە اسىرىلادى. ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ VIRGIN SOIL KZ جشس-ءنىڭ قۇرىلتايشىسى اندرەي نايمانمەن كەزدەسۋ وتكىزدى.
زاۋىتتىڭ قۋاتتىلىعى كۇنىنە 1 مىڭ توننانى قۇرايدى. ينۆەستيتسيالاردىڭ جالپى سوماسى – 30 ملرد تەڭگە. بۇل جوبانى «سارىارقا» اەا اۋماعىندا ىسكە اسىرۋ جوسپارلانىپ وتىر. قۇرىلىس جانە پايدالانۋ كەزەڭىندە 500 جاڭا جۇمىس ورنى قۇرىلادى. جوبانى ىسكە اسىرۋدىڭ جوسپارلانعان مەرزىمى – 2021-2022 جىلدار.
ءمينيستردىڭ ايتۋىنشا, قۇراما جەمنىڭ ساپاسى مەن تيىمدىلىگىنە نازار اۋدارۋ قاجەت. «بالىقتىڭ وزىندىك قۇنى قۇرىلىمىندا جەمگە جۇمسالاتىن شىعىندار جالپى شىعىستاردىڭ 70%-ىن قۇرايدى. سوندىقتان قۇراما جەمنىڭ ساپاسى مەن تيىمدىلىگى – بالىقتى وندىرىستىك ءوسىرۋ رەنتابەلدىلىگىنىڭ شەشۋشى فاكتورى. وسىعان بايلانىستى جوعارى ساپالى جەمنىڭ (قورەكتەنەتىن ازىعىنىڭ) وتاندىق ءوندىرىسىن جولعا قويۋ قاجەت. بۇل ءوز كەزەگىندە يمپورتقا تاۋەلدىلىكتى ازايتۋعا, بيزنەسكە قارجىلىق جۇكتەمەنى ازايتۋعا مۇمكىندىك بەرەدى», دەدى م.مىرزاعاليەۆ
اندرەي نايمان كەزدەسۋ بارىسىندا جوبانىڭ جۇزەگە اسىرىلۋ بارىسىمەن ءبولىستى. ء«بىز «سارىارقا» اەا باسقارۋشى كومپانياسىمەن مەموراندۋمعا قول قويدىق, 25 گەكتار جەر تەلىمى بەلگىلەندى. جالپى, ءوندىرىس گيدروپونيالىق اگرونوميا سالاسىنداعى يزرايلدىك جانە حالىقارالىق عالىمداردىڭ تاجىريبەسىنە نەگىزدەلەتىن بولادى. وندىرىلەتىن جەم 100% «جاسىل» جەم بولادى», دەيدى ينۆەستور. ەسكە سالا كەتەيىك, مينيسترلىك بالىق شارۋاشىلىعىن دامىتۋدىڭ 2030 جىلعا دەيىنگى باعدارلاماسىن ازىرلەدى, ونىڭ نەگىزگى باعىتتارىنىڭ ءبىرى – جەم-ءشوپ ءوندىرىسىن جولعا قويۋ.